2025-yil 25-sentabr kuni Buxoro shahridagi Ark maydonida “Kelajakka qadam” dasturi doirasida “TalabaExpo–2025” kasb ko‘rgazmasi bo‘lib o‘tdi. Tadbir Oliy taʼlim, fan va innovatsiyalar vazirligi, Kambagʻallikni qisqartirish va bandlik vazirligi, “Oʻzmilliybank” AJ, Savdo-sanoat palatasi, Buxoro viloyati hokimligi va Yoshlar ishlari agentligi hamkorligida tashkil etildi.
Ko‘rgazmada 100 dan ortiq korxona va tashkilotlar 1000 dan ziyod vakant o‘rinlarni, amaliyot va stajirovka imkoniyatlarini taklif etdilar. Shuningdek, seminar-treninglar, biznes va startap loyihalar taqdimotlari, imtiyozli kreditlar bo‘yicha maslahatlar hamda madaniy shou dasturlar tashkil etildi.
“TalabaExpo–2025” doirasida yoshlarni real ishlab chiqarish muhiti bilan yaqindan tanishtirish maqsadida Buxoro erkin industrial-iqtisodiy zonasiga amaliy tashrif uyushtirildi. Tashrif davomida ishtirokchilar “Artel” zavodida zamonaviy texnologiyalar asosidagi ishlab chiqarish jarayonlari, mehnat sharoitlari va kasbiy rivojlanish imkoniyatlari bilan tanishdilar.
Ko‘rgazma doirasida Buxoro davlat universitetida “O‘zmilliybank” AJ tomonidan bank xizmatlari hamda bitiruvchi talabalarning innovatsion va startap loyihalari taqdimotlari o‘tkazildi. Eng yaxshi tashabbuslar moliyalashtirish uchun qabul qilinib, talabalarga yirik miqdordagi vaucherlar topshirildi. Jumladan, Buxoro davlat pedagogika instituti talabasi Bahodirova Gullola – 1 milliard so‘m, Jamolova Gulmira – 800 million so‘m, Buxoro davlat texnika universiteti talabasi Yusupova Jasmina – 50 million so‘m miqdoridagi mablag‘ bilan taqdirlandilar.
Shuningdek, Buxoro davlat universitetida “TalabaExpo–2025” doirasida iqtidorli va faol talabalarni taqdirlash marosimi bo‘lib o‘tdi. Talabalik yillarida bilimdonligi, tashabbuskorligi, ilmiy izlanishlari va sportdagi yutuqlari bilan ajralib turgan talabalar “Eng lider talaba”, “Kitobxon talaba”, “Eng yaxshi dasturchi”, “Eng zukko talaba” kabi turli nominatsiyalar bo‘yicha taqdirlandilar.
Mazkur tadbir yoshlar uchun nafaqat ish va amaliyot imkoniyatlari, balki yangi tanishuvlar va kelajak kasbiy yo‘lini belgilashda ham katta maydon bo‘lib xizmat qildi.
