O‘zbekiston Respublikasi Prezidenti Shavkat Mirziyoyevning Nyu-York shahridagi Birlashgan Millatlar Tashkiloti Bosh Assambleyasining 80-yubiley sessiyasida so‘zlagan nutqi nafaqat mamlakatimiz, balki butun jahon hamjamiyati uchun g‘oyat muhim ahamiyatga ega bo‘ldi. Davlatimiz rahbari tomonidan ilgari surilgan g‘oya va tashabbuslar global xavf-xatarlar kuchayib borayotgan bugungi murakkab davrda tinchlik, hamjihatlik va barqaror taraqqiyotga xizmat qiladi.
Prezidentimizning nutqida jahon hamjamiyati oldida turgan dolzarb muammolar — qo‘zg‘alib borayotgan geosiyosiy ziddiyatlar, ijtimoiy va iqtisodiy tengsizlik, ekologik inqirozlar, terrorizm va ekstremizm xavflari kabi masalalarni hal etishda BMTning asosiy platforma sifatidagi o‘rni va roli alohida qayd etildi. Davlatimiz rahbarining BMT Xavfsizlik Kengashini transformatsiya qilish, uning tarkibini kengaytirish haqidagi taklifi ham xalqaro tashkilotlar faoliyatini isloh qilish yo‘lida muhim qadam hisoblanadi.
Shu bilan birga, Prezidentimiz nutqida Yangi O‘zbekistonda olib borilayotgan ortga qaytmas islohotlar jarayoni, inson qadrini yuksaltirish, aholi farovonligini ta’minlashga qaratilgan keng ko‘lamli ishlar batafsil yoritildi. Kambag‘allik darajasining keskin qisqarishi, ta’lim va sog‘liqni saqlash sohalarida amalga oshirilayotgan o‘zgarishlar, “yashil” iqtisodiyot va innovatsion sanoatni rivojlantirish borasidagi tashabbuslar davlatimiz taraqqiyotining izchil va samarali yo‘lda ekanini ko‘rsatib turibdi.
Alohida ta’kidlash joizki, ta’lim sohasiga oid tashabbuslar – pedagoglarning o‘zaro tajriba almashishi uchun yagona xalqaro platformani yaratish, Butunjahon professional ta’lim sammitini O‘zbekistonda o‘tkazish taklifi mamlakatimizda bilim va ilm-fan taraqqiyotiga berilgan yuksak e’tiborning yaqqol ifodasidir. Bu tashabbuslar albatta jahon ta’lim maydonida ham katta ahamiyatga ega bo‘ladi.
Shuningdek, Prezidentimiz tomonidan iqlim o‘zgarishi, suv resurslaridan oqilona foydalanish, Orolbo‘yida ekologik barqarorlikni ta’minlash, yoshlar tarbiyasi, gender tengligi va xotin-qizlarning jamiyatdagi nufuzini oshirish kabi masalalarda ilgari surilgan taklif va g‘oyalar har birimizni yangi tashabbuslar sari ruhlantiradi. Xususan, “Jahon yoshlarining tinchlik sari harakati” tashabbusi kelajak avlod ongida bag‘rikenglik, tinchlik va hamjihatlik g‘oyalarini mustahkamlashda muhim o‘rin tutadi.
Buxoro davlat universiteti jamoasi Prezidentimizning ushbu nufuzli minbarda ilgari surgan g‘oya va tashabbuslarini to‘liq qo‘llab-quvvatlaydi. Biz Yangi O‘zbekiston taraqqiyoti yo‘lida ta’lim va ilm-fan sohasida amalga oshirilayotgan islohotlarga o‘z hissamizni qo‘shish, yoshlarimizni zamonaviy bilim va innovatsion tafakkurga ega, vatanparvar va mas’uliyatli shaxslar qilib tarbiyalash yo‘lida barcha imkoniyatlarimizni safarbar etamiz.
Bugungi kunda Buxoro davlat universitetida ham ta’lim sifatini oshirish, ilmiy izlanishlarni rivojlantirish va xalqaro hamkorlikni kengaytirishga alohida e’tibor qaratilmoqda. Universitetimiz jahonning 100 dan ortiq yetakchi universitetlari bilan hamkorlik aloqalarini o‘rnatgan, qo‘shma ta’lim dasturlari va ilmiy loyihalar amalga oshirilmoqda. Bu boradagi sa’y-harakatlarimiz Prezidentimiz tomonidan belgilangan ustuvor vazifalarning amaliy ifodasidir.
Shuningdek, universitetimizda xalqaro grantlar asosida ilmiy laboratoriyalar, yosh olimlar uchun innovatsion startap markazlari tashkil etilmoqda. Talabalarning xorijiy mamlakatlarda malaka oshirishi, akademik mobillik dasturlari orqali ilg‘or tajriba orttirishi uchun sharoitlar yaratilmoqda. Prezidentimizning inson kapitalini rivojlantirishga qaratilgan tashabbuslari biz uchun yo‘l-yo‘riqdir. Zero, ta’lim va ilm-fan taraqqiyoti – mamlakatning barqaror rivojlanishi, millatning buyuk kelajagi garovidir.
Buxoro davlat universiteti jamoasi davlatimiz rahbarining barcha g‘oya va tashabbuslarini amaliyotga tadbiq etish uchun o‘zining barcha kuch va salohiyatini safarbar etadi. Biz yoshlarimizni Vatan taqdiriga befarq bo‘lmagan, zamonaviy bilim va yuksak ma’naviyatga ega shaxslar qilib tarbiyalashni, ularni jahon miqyosida raqobatbardosh kadrlar sifatida voyaga yetkazishni o‘z oldimizga oliy maqsad qilib qo‘yamiz. Shu bois, Prezidentimizning BMT Bosh Assambleyasidagi nutqi biz uchun nafaqat faxr, balki yanada katta mas’uliyat, yangicha islohotlar sari undovchi qudratli chaqiriq bo‘lib yangradi.
Biz, oliy ta’lim muassasasi sifatida, Prezidentimiz belgilab bergan ustuvor yo‘nalishlar – inson kapitaliga sarmoya kiritish, ilm-fan va innovatsiyani rivojlantirish, yoshlar iqtidorini yuzaga chiqarish va jahon ilmiy-amaliy maydonida munosib o‘rin egallash yo‘lida faoliyatimizni yanada kuchaytiramiz.
Obidjon Xamidov
Buxoro davlat universiteti rektori, iqtisodiyot fanlari doktori, professor
