“Bu yil biz uchun ayniqsa unutilmas bo‘lib, faxrli bir sana – Buxoro davlat universitetining 95 yilligi nishonlanmoqda. Bu azim dargoh bir asrga yaqin vaqt mobaynida minglab ziyolilarni, olimlarni, mutaxassislarni yetishtirib, ilm-fan va ma’rifat rivojiga ulkan hissa qo‘shdi. So‘nggi yillarda universitetning xalqaro reytinglardagi o‘rni sezilarli darajada yaxshilangani, nufuzli Times Impact reytingida jahonning yetakchi universitetlari orasida 601-800 guruhidan o‘rin egallagani, Greenmetric reytingida jahonda 447-o‘rindaligi, QS Osiyo reytingida esa kuchli 900 talikda ekanligi fikrimizning isbotidir. Bu natija universitet jamoasining fidokorona mehnati, professor-o‘qituvchilarning ilmiy salohiyati va talabalarimizning intiluvchanligi samarasidir.
Aziz bitiruvchilar! Oldingizda yangi hayot bosqichi — kasbiy faoliyat boshlanmoqda. Bu bosqichda sizlarni ko‘plab sinovlar kutadi. Shunday paytlarda sobitqadamlik, halollik, va vatanparvarlik sizlarga yo‘lchi yulduz bo‘lsin.”- Buxoro viloyati hokimi Botir Zaripovning yo’llagan tabrigidan.
“Qadrli universitet bitiruvchilari! Sizlarni universitetni muvaffaqiyatli tamomlab, mustaqil hayotga – umringizning yanada go‘zal va mas’uliyatli bosqichiga qadam qo‘yayotganingiz bilan chin qalbimdan samimiy tabriklayman. Shaxsan o‘zim, qolaversa, universitet jamoasi nomidan sizlarga katta umid va ishonch ramzi bo‘lgan diplomlar muborak bo‘lsin! Oq yo‘l sizga, Yangi O‘zbekistonning bunyodkorlari – qadrli bitiruvchilarimiz!”- deydi BuxDU rektori Obidjon Xamidov tantanali marosimda so’zlagan nutqida.
Marosimda viloyat va respublika miqyosidagi bir qator nufuzli mehmonlar, oliygoh rahbariyati, professor-o‘qituvchilar, talabalar hamda ota-onalar ishtirok etdi.
Tadbir doirasida BuxDU “Universal” sport majmuasi bosh foyesida universitetning tarixi, talabalarning erishgan yutuqlari va hayotidan lavhalar aks etgan ko‘rgazma hamda rasmlar galereyasi tashkil etildi. Mehmonlar San’atshunoslik fakulteti vakillari tomonidan ijro etilgan milliy kuy-qo‘shiqlar sadolari ostida kutib olindi.
Marosim avvalida professor H.T. Artikova BuxDU bitiruvchilarini samimiy qutlab, universitet jamoasini “Times Higher Education Impact Rankings 2025” global reytingida dunyoning nufuzli 800 ta universiteti qatoridan joy olgani munosabati bilan muborakbod etdi. Shuningdek, Buxoro viloyati hokimi Botir Zaripovning bitiruvchilarga yo‘llagan tabrigi o‘qib eshittirildi. Shuningdek, Top-1000 lik sertifikati tantanali tarzda topshirildi.
Tadbir davomida Muhammad Ahmedov va Shodmon Sulaymonov so‘zga chiqib, bitiruvchilarni hamda universitet jamoasini ushbu muhim sana bilan tabrikladilar. Shuningdek, Sport boshqarmasi boshlig‘i U. Nadjimidinov “Dolzarb 90 kun” loyihasi doirasida o‘tkazilgan sport musobaqalari g‘oliblarini taqdirlab, yoshlarga ezgu tilaklarni bildirdi.
Tadbirda Buxoro viloyati hokimi o‘rinbosari, biologiya fanlari doktori, professor H.T. Artikova, “O‘zbekiston Qahramoni”, Madaniyat Muhammad Ismat fermer xo‘jaligi rahbari Muhammad Ahmedov, Buxoro viloyat mintaqaviy vakili, falsafa fanlari doktori, professor A. Amanovna, viloyat Kengashi deputati Sherzod Raxmonov Buxoro viloyati Sport boshqarmasi boshlig‘i U. Nadjimidinov, O‘zbekiston Yozuvchilar uyushmasi Buxoro viloyat bo‘limi rahbari Shodmon Sulaymonov, Buxoro davlat universiteti rektori, iqtisodiyot fanlari doktori, professor Obidjon Xamidov Xafizovich hamda boshqa oliy ta’lim muassasalari rahbarlari ishtirok etib, bitiruvchilarga diplomlarni tantanali ravishda topshirdilar.
Talaba-yoshlarning iqtidori, ilmiy sohadagi qiziqish va intilishlari natijasida universitetning 2 nafar talabasi Prezident stipendiyasi, 7 nafar talaba Navoiy nomidagi, 1 nafar talaba Bobur nomidagi, 1 nafar talaba Islom Karimov nomidagi, 1 nafar talaba Mirzo Ulug‘bek nomidagi, 1 nafar talaba Beruniy nomidagi, Abdurauf Fitrat nomidagi 3 nafar stipendiya sovrindorlari, shuningdek, 15 nafar talaba rektor stipendiyalarini qo‘lga kiritishdi. Yana 3 nafar talaba Ulug‘bek vorislari tanlovi Respublika bosqichi g‘olibi bo‘lishgan bo‘lsa, 400 dan ortiq talaba-yoshlar Xalqaro, Respublika va viloyat miqyosidagi intellektual, ilmi-fan, musiqa, san’at, sport, turizm, IT soha va yo‘nalishlarida o‘tkazilgan olimpiadalar, tanlovlar, musobaqalarda ishtirok etib nufuzli o‘rinlarni qo‘lga kiritdi.
Buxoro davlat universitetini 2024/2025 o‘quv yilida 51 ta ta’lim yo‘nalishi kunduzgi shakl bo‘yicha 2549 nafar, sirtqi ta’lim shakli bo‘yicha 17 ta ta’lim yo‘nalishi bo‘yicha 2335 nafar, jami 4884 nafar talaba bakalavr, 36 ta mutaxassislik bo‘yicha 215 nafar magistr o‘qishni tamomladi.
Umumiy jami 5099 nafar bitiruvchi, jumladan 3524 nafari ayol, 1575 nafari erkak, 907 nafari grant va 4192 nafari to‘lov shartnoma asosida tahsil oldi.
Joriy o‘quv yilida 52 nafar talaba a’lo baholarga o‘qib imtiyozli diplomlarga ega bo‘ldi.
Buxoro davlat universitetining yutuqlari va yetishtirib chiqargan malakali mutaxassislari bilan faxrlanishga haqli ekanligini yana bir bor namoyon etgan ushbu marosim barcha ishtirokchilarda unutilmas taassurot qoldirdi.
