O‘zbekiston Respublikasi Prezidenti Shavkat Miromonovich Mirziyoyev raisligida yoshlar masalasiga bag‘ishlangan muhim selektor yig‘ilishi bo‘lib o‘tdi. Unda yoshlar bilan ishlash tizimini tubdan takomillashtirish, ularning muammolarini aniqlash va bartaraf etish, har bir yoshning jamiyatdagi o‘rnini belgilashga qaratilgan dolzarb vazifalar ilgari surildi.
Davlatimiz rahbari tomonidan bildirgan fikrlar, xususan:
“Yoshlar – bu bizning kelajagimiz emas, balki bugungi islohotlarimizning hal qiluvchi kuchidir” degan tamoyil, bugungi kundan boshlab har bir oliy ta’lim muassasasi faoliyatida bosh mezonga aylanishi kerak.
Buxoro davlat universiteti rahbariyati ushbu selektor yig‘ilishi mazmunini chuqur tahlil qilgan holda, yoshlarga oid davlat siyosatini amaliyotga joriy etish borasida tizimli ishlarni olib bormoqda. Jumladan:
Talabalarning ijtimoiy, iqtisodiy va huquqiy manfaatlarini himoya qilish;
Ularning ta’lim olishi, intellektual salohiyatini ro‘yobga chiqarishi, sport va san’at bilan shug‘ullanishi uchun keng imkoniyatlar yaratish;
Har bir yoshning o‘z iqtidorini namoyon etishi va jamiyatda munosib o‘rin egallashi uchun sharoitlar yaratish asosiy vazifamiz sifatida belgilab olingan.
Prezidentimiz tomonidan ilgari surilgan “Yoshlar — kelajagimiz”, “Yoshlar daftari”, “Besh tashabbus”, “Yoshlar uchun 1 milliard” kabi tashabbuslar nafaqat mamlakat miqyosida, balki oliy ta’lim muassasalari faoliyatida ham amaliy yo‘nalishga ega bo‘lmoqda.
Shuningdek, yoshlarning tashabbuslari asosida tashkil etilgan o‘nlab klub, to‘garak va ijtimoiy loyiha orqali ularning bo‘sh vaqtini mazmunli tashkil etish, ijtimoiy faolligini oshirish, sog‘lom hayot tarzini qaror toptirishga alohida e’tibor qaratilmoqda.
Davlatimiz rahbari selektor yig‘ilishida tanqidiy ruhda bildirilgan fikrlar, ayniqsa, “yoshlar o‘rtasida loqaydlik, ijtimoiy befarqlik kuchaymoqda, muammolar vaqtida aniqlanmayapti” degan mulohazalar oliy ta’lim tizimi uchun uyg‘otuvchi signal bo‘lishi kerak. Bu borada universitet mas’ullariga aniq topshiriqlar berilib, har bir fakultet dekanlari va tyutorlar faoliyati qayta ko‘rib chiqilmoqda. Talabalar muammolarini erta aniqlash va manzilli yordam ko‘rsatish maqsadida psixologlar shtati kengaytirildi, “Ishonch qutisi” va “Raqamli monitoring” tizimlari joriy etildi.
Yoshlar uchun yaratilayotgan imkoniyatlar – bu ularning hayotga bo‘lgan ishonchini oshirish, Vatanga sadoqat bilan xizmat qilishga undash vositasi hamdir. Shuning uchun ham, universitetimizda yoshlarga oid har bir qaror endilikda talabalar ishtirokida qabul qilinadi. Bu orqali “yoshlar ishtirokchisi emas, tashabbuschisi bo‘ladi” degan tamoyilni mustahkamlashga erishiladi.
Yuqoridagilardan kelib chiqib, Buxoro davlat universiteti jamoasi Prezident raisligida o‘tgan selektor yig‘ilishi mazmunini chuqur tahlil qilgan holda, unda ilgari surilgan g‘oya va topshiriqlarni o‘z faoliyatining asosiy strategik yo‘nalishi sifatida belgilaydi.
Biz, Buxoro davlat universiteti jamoasi, davlatimiz rahbarining yoshlarga oid siyosatini to‘liq qo‘llab-quvvatlaymiz va bu yo‘nalishda mas’uliyat bilan faoliyat yuritishga tayyormiz.
Ishonamizki, bu e’tibor va g‘amxo‘rlik — Vatanimiz kelajagi bo‘lmish yoshlarga katta ishonch va yuksak mas’uliyat yuklaydi. Har bir yosh avvalo bilimli, fidoyi va Vatanga sadoqatli bo‘lishi, yangilanishlar jarayonining faol ishtirokchisiga aylanishi zarur.
