Joriy yilning 13-iyun kuni Qozog‘istonning L.N. Gumilyov nomidagi Yevrosiyo milliy universitetida malaka oshirish dasturi doirasida ishtirok etayotgan Buxoro davlat universiteti professor-o‘qituvchilari tomonidan ramziy va ezgu tashabbus — “BuxDU bog‘i” barpo etildi.
Tadbir doirasida universitet hududida daraxt ko‘chatlari ekildi va ekologik muhitni yaxshilash, yashil makon yaratishga hissa qo‘shildi. Ushbu aksiya ikki oliy ta’lim muassasasi o‘rtasidagi do‘stona aloqalarni mustahkamlash, barqaror rivojlanish g‘oyalarini targ‘ib qilish hamda ekologik madaniyatni yuksaltirish yo‘lida muhim qadamlardan biri bo‘ldi.
"BuxDU bog‘i" nafaqat yashillik ramzi, balki Buxoro davlat universiteti bilan Yevrosiyo milliy universiteti o‘rtasidagi do‘stlik, hamkorlik va o‘zaro hurmat timsoliga aylandi. Ushbu tashabbus ishtirokchilarda katta taassurot qoldirdi va kelajakda hamkorlik aloqalarini yanada mustahkamlashga zamin yaratdi.
