Buxoro shahridagi “Abdurauf Fitrat” bog‘ida BuxDU jamoasi tomonidan “Milliy qadriyatlar sayli” madaniy-ma’rifiy tadbirlar bo'lib o'tdi.
An'anaviy tarzda tashkil etilayotgan “Milliy qadriyatlar sayli” ajdodlarimiz merosini, urf-odatlarimizni, san’at va madaniyatimizni qadrlashga, yosh avlodga yetkazishda juda katta ahamiyat kasb etadi. Ayni damda o'tkazilayotgan BuxDU jamoasi tomonidan tashkil etilgan tadbirlar ham o‘zlikni anglash, tariximiz va an’analarimizga hurmat ruhida yashash sari yana bir qadamdir.
Musiqa ijrochiligi va madaniyat kafedrasining iqtidorli talabalari ijrosidagi milliy ohanglar jo'rligida mehmonlar kutib olindi. San’atshunoslik va pedagogika fakulteti ijodkor talabalari tomonidan milliy qadriyatlarni tarannum etuvchi tasviriy san’at yo‘nalishidagi ijodiy ishlar ko‘rgazmasi tashkil etildi. Shu bilan birga, milliy liboslar ko'rgazmasi ham bo'lib o'tdi. Milliy qadriyatlarimizni tarannum etish maqsadida buxorcha kuy-qo‘shiqlar, doirachilar chiqishi, mavrigi, shashmaqom hamda boshqa sahna ko‘rinishlarini yig'ilganlarga xush kayfiyat baxsh etdi.
Festival doirasida milliy qadriyatlarimizni tarannum etuvchi bir qator tadbirlar amalga oshirildi. Jumladan, “Beshik bog‘lash”, “Sallabandon”, “Kelin salom” marosimlari o'tkazildi. Shu bilan birga, “Usma qо‘yish”, “Hina qо‘yish”, “Sochni mayda о‘rish (jamalak)” jarayonlari milliy kuy-qо‘shiqlar hamohangligida tashkil etildi. Shuningdek, mushoira (sheʼrxonlik) hamda gʻazalxonlik tadbirlari o'tkazildi.
Sayl davomida bir qator milliy o'yinlar: “Besh tosh”, “Chor po‘choq”, kurash, lanka, arqon tortish, “Oq terakmi, kо‘k terak?”, “Kim oladi?”, “Chillak” kabi o'yinlar tashkil etildi.
Shuningdek, "Sport oyligi" doirasida shashka, shaxmat, stol tennisi, armrestling, sportchi yoshlarning chiqishlari bo'lib o'tdi.
