11.01.2022

Yaqinda O‘zbekiston Respublikasining Yekaterinburg shahridagi bosh konsulligi tashkilotchiligi natijasida Tyumen davlat universiteti bilan muzokaralar o‘tkazilgan hamda hamkorlik o‘rnatish borasida fikr almashilgan edi. Bugun universitetimizning rasmiy xorijiy hamkorlari soni yana birtaga oshib, Tyumen davlat universiteti bilan onlayn ravishda hamkorlik memorandumini imzolash marosimi bo‘lib o‘tdi. Tadbirda O‘zbekistonning Yekaterinburgdagi bosh konsuli A.Xatamov, BuxDUdan rektor O.Xamidov, xalqaro hamkorlik bo‘yicha prorektor A.Jo‘rayev, bir nechta dekanlar va kafedra mudirlari, TyumDUdan esa rektor v.v.b. A.Tolstikov, prorektorlar E.Sechenova, A.Patrushev, xalqaro aloqalar boshqarmasi boshlig‘i A.Seryakovlar ishtirok etishdi.Bosh konsul A.Xatamov, rektor O.Xamidov hamda rektor v.v.b. A.Tolstikov o‘z tabrik nutqlarida mamlakatimizning Rossiya Federatsiyasi bilan turli sohalarda o‘zaro manfaatli aloqalari rivojlanib borayotganligini, xususan oliy taʼlim sohasidagi hamkorlik bunda alohida ahamiyat kasb etishini, BuxDU va TyumDU o‘rtasida imzolanadigan hamkorlik memorandumi yangi yutuqlarga yo‘l ochib berishini qayd etib o‘tishdi.Hamkorlik memorandumini onlayn ravishda imzolash marosimidan so‘ng, aniq masalalar bo‘yicha ham kelishib olindi. Xususan, 2021 yilning 29 yanvar kuni “Sibirdagi buxoroliklarning hudud ijtimoiy-iqtisodiy va madaniy hayotiga qo‘shgan hissasi” mavzusida xalqaro konferensiya o‘tkazilishi, shuningdek yana yanvar oyida ikki tomon talabalarining AKT sohasi bo‘yicha ishlanmalarining onlayn ko‘rgazmasi tashkil qilinishi belgilandi.Shu kunning o‘zida TyumDU kutubxona-muzey majmuasida “Tyumen va O‘zbekiston: aloqalarning tarix va bugungi kundagi xilma-xilligi” mavzusidagi ko‘rgazmasi ochildi. Universitet kutubxonasidagi ko‘rgazma TyumDU va BuxDU o‘rtasidagi do‘stona aloqalarga bag‘ishlangan bo‘lib, unda xalqimizning boy tarixi va madaniyati bilan bog‘liq namunalar o‘rin olgan.Yaqin kunlar ichida Tyumen davlat universitetida respublikamizning Yekaterinburgdagi bosh konsulligi hamda Buxoro davlat universiteti yordamida “O‘zbek tili va adabiyoti markazi” ham tashkil etiladi.BuxDU Xalqaro hamkorlik bo'limi