11.01.2022

2020-yilning 13-noyabr kuni Buxoro davlat universiteti Xorijiy tillar fakulteti Tabiiy yo‘nalishlarda chet tili kafedrasi Buxoro viloyati Buxoro tuman Xalq ta’limi bo‘limiga qarashli 3-son umumiy o‘rta ta’lim maktabida kafedra filialini ochdi. Ochilish marosimida universitet rektori O.X.Xamidov, Tabiiy yo‘nalishlarda chet tili kafedrasi mudiri va professor-o‘qituvchilari hamda maktab jamoasi qatnashdi.Ikki tomon o‘zaro hamkorlik memorandumini imzolashdi. Oliy ta’lim va umumiy o‘rta ta’lim muassasalari orasida imzolangan o‘zaro hamkorlik kafedra professor-o‘qituvchilari va maktabda faoliyat olib borayotgan o‘qituvchilarning hamkorlikda loyihalarni amalga oshirishi, uslubiy va ilmiy tadqiqotlar olib borishini ko‘zlaydi. Tabiiy yo‘nalishlarda chet tili kafedrasi O‘zbekistondagi AQSH elchixonasining 2020-2022 yillarga mo‘ljallangan “Access Microscholarship Program” dasturini amalga oshirish maqsadida $24 900 miqdoridagi grantni qo‘lga kiritgan edi. Mana shu loyihani amalga oshirish uchun Buxoro tumanidagi 3-son maktabi tanlandi. Grant maqsadiga ko‘ra, maktabda tahsil olayotgan ijtimoiy himoyaga muhtoj 30 nafar o‘quvchi-yoshlar ikki yil davomida bepul ingliz tili o‘quv kurslariga qatnashish imkoniyatiga ega bo‘ldilar. Darslar 2020 yil 1 noyabrda boshlandi. Shuningdek, grant doirasida o‘quvchilarni chet ellarda chop etilgan zamonaviy darslik va lug‘atlar bilan ta’minlash, ikkita o‘quv xonasini kompyuter va boshqa texnik jihozlar bilan ta’minlash ham ko‘zda tutilgan...BuxDU Matbuot xizmati