11.01.2022

2020-yilning 8-noyabr kuni Buxoro davlat universitetida Buxoro biznes akseleratorining ochilish marosimi bo'lib o'tdi. Ochilish marosimini Buxoro viloyati hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari Xamrayev Mirali Muxammadjonovich, O‘zbekiston Respublikasi Oliy va o‘rta maxsus ta’lim vazirining axborot texnologiyalari va yoshlar bo'yicha oʻrinbosari Absoatov Yusuf Qodirovich hamda BuxDU rektori Xamidov Obidjon Xafizovichlar ochib berdilar. Ochilish marosimida shuningdek BuxDU Xalqaro hamkorlik bo'yicha prorektor A.Jo'rayev, fakultet dekanlari, kafedra mudirlari, professor-o'qituvchilar hamda ommaviy axborot vositalari muxbirlari ishtirok etishdi. Mazkur biznes akselerator “Yoshlar kelajagimiz” jamg‘armasining 150 mln. so‘m, BuxDUning 108 mln. so‘m mablag‘lari evaziga tashkil qilinmoqda. Ushbu biznes akselerator 3 ta xonada joylashgan bo‘lib, zarur jihozlar va texnikalar bilan ta’minlangan. Mazkur biznes akseleratorda bir vaqtning o‘zida 40 nafar tinglovchini tadbirkorlikka o‘qitish mumkin. 3 nafar xodim doimiy shtatda ishlaydi. Muassasaning asosiy vazifalari bu tadbirkorlik sub’yektlariga o‘z biznesini yuritishda yaqindan yordam berish, ularga zamonaviy biznes tamoyillarini amalda joriy qilishda ko‘maklashish, ilg‘or axborot, innovatsion va pedagogik texnologiyalar yordamida tadbirkorlik kurslarini tashkil etishdir. Bunda universitetimiz va respublikaning yetakchi mutaxassislarini ta’lim va maslahatlashuv jarayonlariga jalb qilish nazarda tutilgan.Buxoro biznes akseleratorining nafaqat Buxoro viloyati, balkim, butun O‘zbekistonda biznes muhitini yaxshilashda xizmatlari katta bo‘ladi deb umid qilamiz. Ma'lumot sifatida aytish mumkinki, akselerator – ingliz tilidan «tezlashtiruvchi» degan ma’noni anglatadi. Akselerator – biznesi boshqa kompaniyalarga (akselerator rezidentlariga) yordam berishdan iborat bo‘lgan kompaniya. Akseleratorlar rezidentlarga jamoaga biznes-modelni «charxlash»da, zarur kontaktlarga ega bo‘lishda va savdoni oshirishda yordam beradigan dasturni taklif qiladi. Akseleratorlar orasida Y-Combinator eng birinchi bo‘lib yaratilgan. Unga 2005 yilda Bostonda Pol Grem asos solgan. Ular uch oylik biznes-dasturlar va kichik investitsiyalarni taklif qilgan. O‘zbekistondagi birinchi akselerator esa 2015 yildagina paydo bo‘ldi. 2018 yil sentyabrda O‘zbekistondagi ilk Ilmiy loyihalar akseleratori - C.A.T. Science Accelerator tashkil etildi.Akselerator startaplarga qanday yordam beradi?O‘zbekistonda iqtisodiy sektorni rivojlantirishda tadbirkorlik va innovatsiya uchun qo‘l keluvchi ekotizimni yaratish zarurligi kundek ravshan masala. Bunday ekotizimda startap loyihalar va biznes akseleratorlar muhim rol o‘ynaydi.Har qanday ishlab chiqarish va xizmat ko‘rsatish kompaniyasiga biznes maslahat beruvchi mutaxassislar ko‘magi kerak bo‘ladi. Bunday vaziyatda esa universitetlar va ilmiy markazlar qoshida joriy etilgan maxsus tuzilmalar – biznes aksileratorlar qo‘l keladi. Akseleratordagi ishtirok yosh olimlar va jamoalarga o‘z tajribalari uchun ilmiy maydon, mutaxassislar ko‘magi va qo‘llab quvvatlovini taqdim etish bilan birga, MVP, ya’ni loyihaning minimal ishchi talqinini ishga tushirishga ham yordam beradi. Eng yaxshi loyihalar esa yakunda biznesni rivojlantirish   uchun investisiyalarni qo‘lga kiritishi mumkin. Innovasion ekotizimning shakllanishida va rivojlanishida Biznes-akseleratorlar muhim rol o‘ynaydi. Keyingi yillarda O‘zbekistonda qator texnoparklar, ilmiy-tadqiqot markazlari, startap akseleratorlar va inkubatorlar tashkil etilyaptiki, bularning bari yurtimiz innovasion tizimining shakllanishiga va rivojlanishiga hissa qo‘shib kelmoqda.Jumladan, “Yashnobod” innovasion texnoparki 23 ta rezidentlari tomonidan 2018-2020 yillarda 3,1 mln. AQSH dollari miqdorida investisiyalar o‘zlashtirilib, kimyo texnologiyalari, mashinasozlik qurilish materiallari ishlab chiqarish uchun yo‘naltirildi. Bunday markazlar nafaqat poytaxtimizda, xususan, respublikamizning chekka hududlarida tashkil etilayotgani ahamiyatga molikdir. Xususan, Urganchda tashkil etilgan “Xorazm” texnoparki Xorazm viloyatining ilmiy-texnik va innovasion imkoniyatlarining oshishiga xizmat qiladi. Aholini oflayn tarzda axborot resurs bazasidan foydalanish imkonini yaratish maqsadida respublikamizning chekka hududlarida joylashgan maktablar, OTMlar va jamoat gavjum bo‘lgan joylarga 100 dona “Q-Box” moslamalari o‘rnatildi.Ishsiz yurgan yoshlarni ish bilan ta’minlash maqsadida Hindiston va Xitoy kompaniyalari bilan hamkorlikda Sirdaryo viloyatida “Biznes-akselerator” o‘quv-amaliy markazi faoliyati tashkil etilmoqda. O‘zbekiston Milliy universitetida kasbiy ta’lim, malaka oshirish, tor mutaxassis kadrlarni qayta tayyorlash bo‘yicha xizmatlarni ko‘rsatishga mo‘ljallangan NAPA EDU HUB (barcha o‘quv markazlarini birlashtiruvchi yagona Akademiya) faoliyatini boshlash arafasida.BuxDU Matbuot xizmati