11.01.2022

2020-yilning 16-oktabr kuni Buxoro davlat universiteti  Iqtisodiyot   va turizm fakultetida  3-2xs-17  guruh talabalari, Buxoro tarix kafedrasi o'qituvchisi Mubinov Muxammadali, guruh murabbiysi F.K.Saidova ishtirokida Zoom dasturi orqali  “Korrupsiyaga qarshi kurashish” nomli tadbir o‘tqazildi. Ushbu onlayn tadbirda kun tartibiga kiritilgan dolzarb masalalar aytib o‘tildi. Unga ko‘ra universitetda faoliyat olib borayotgan professor – o‘qituvchi va talaba yoshlar o‘rtasida poraxo‘rlik, ta’magirlik, korrupsiyaga qarshi kurash, huquqbuzarlik holatlari bo‘yicha jazo muqarrarligini keng tushuntirish.  Kun tartibidagi masala yuzasidan guruh murabbiysi F.K.Saidova kirish so‘zi bilan tadbirni ochib berdi F.K.Saidova so‘zga chiqib, mamlakatimizda huquqiy demokratik davlat va fuqarolik jamiyatini barpo etish yo‘lida izchil, tizimli va bosqichma-bosqich islohotlar amalga oshirilmoqda.Xususan, sud-huquq tizimini isloh qilish, fuqarolarning huquq hamda erkinliklarini, jamiyat va davlatning qonuniy manfaatlarini himoya qilish, qonun ustivorligini ta’minlash, tadbirkorlikni qo‘llab-quvvatlash, davlatimizning iqtisodiy xavfsizligini ta’minlash borasida keng ko‘lamli ishlar izchillik bilan amalga oshirib kelinayotganligini ta’kidlab o'tdi.  Buxoro tarix kafedrasi o'qituvchisi Mubinov Muxammadali so'z olib,  davra suhbatini davom ettirdi: Bugungi globallashuv va  integrasiyalashuvi asrida, zamonaviy innovasion axborot-texnologiyalarning, shuningdek, boshqa texnika va texnologiyalarning o‘ta tez sur’atda rivojlanishi va takomillashtirilishi bilan bir qatorda, davlatlarning xavfsizligiga tahdid soluvchi narkotrafik, qurol-yarog‘ odam savdosi, korrupsiya, jinoiy faoliyatdan olingan daromadlarni legallashtirish va terrorizm kabi transmilliy ko‘rinishdagi xavfli uyushgan jinoyatchilik ortib borayotgani ko‘zga yaqqol tashlanmoqda. Bunday tahdidlarning oldini olish, ularga qarshi samarali kurash olib borish va barqarorlikni ta’minlash maqsadida har qaysi davlat zarur choralarni ko‘radi.Korrupsiya va poraxo‘rlik davlatni ich-ichidan yemirishi jahondagi ba’zi davlatlar tajribasidan yaxshi ma’lum. BMTning 2003 yil 31 oktyabrda qabul qilingan Korrupsiyaga qarshi konvensiyasi xalqaro-huquqiy hujjat bo‘lib, uning loyihasi ikki yil davomida 130 dan ortiq davlat ishtirokida muhokama etilgan edi. Unda korrupsiyaga qarshi xalqaro va milliy kurash amaliyotini yo‘lga qo‘yish hamda ularni amalga oshirish mexanizmlari belgilab berilgan. O‘zbekiston ushbu konvensiyaga 2008 yil 7 iyulda qo‘shilgan. Poraxo‘rlik munosabatlarini uch sub’yektli deb aytish mumkin. Bular: pora oluvchilar, pora beruvchilar va ular o‘rtasida vositachilardir. Pora oluvchilar davlat amaldorlari bo‘lsa, uni beruvchilar amaldorlar marhamatiga muhtojlardir. Vositachilik vazifasini esa ayrim shaxslar va yashirin tashkilotlar amalga oshiradilar. Korrupsiya asosiy ijtimoiy xizmatlarni pora berish imkoni bo‘lmagan shaxslar uchun yetishib bo‘lmas narsaga aylantiradi. Korrupsiya rivojlanishi uchun mo‘ljallangan ozgina mablag‘ni boshqa maqsadlarga sarflab, asosiy ehtiyojlar oziq-ovqat, sog‘liqni saqlash va ta’lim sohasidagi ehtiyojlarning ta’minlanishini qiyinlashtiradi, u har xil ijtimoiy guruhlar o‘rtasida kamsitish, tengsizlik va adolatsizlikni keltirib chiqaradi, xorijiy investisiyalar va yordamlarni qochiradi, rivojlanishni sekinlashtiradi. Shu bois u siyosiy barqarorliki va ijtimoiy-iqtisodiy taraqqiyot yo‘lidagi jiddiy g‘ov hisoblanadi.Korrupsiyaning xatarli joyi yana shundaki, u harom pullarni “halollab” olishga va shu orqali terrorizm hamda ekstremizmni moliyalashtirishga xizmat qiladi. Buning uchun korrupsiyaga qarshi kurashda xalqaro birdamlik va hamkorlikni ta’minlash davr talabiga aylandi.Jinoyat kodeksining 211-va 212-moddalariga o‘zgartirish va qo‘shimcha kiritildi. Masalan, 211-moddaning 3-qismiga kiritilgan qo‘shimchaga binoan «Basharti shaxsga nisbatan pora so‘rab tovlamachilik qilingan bo‘lsa va ushbu shaxs jinoiy harakatlar sodir etilganidan keyin bu haqda o‘ttiz sutka mobaynida o‘z ixtiyori bilan arz qilsa, chin ko‘ngildan pushaymon bo‘lib, jinoyatni ochishda faol yordam bergan bo‘lsa, u javobgarlikdan ozod etiladi».Shuningdek, 212-moddaning 3-qismiga kiritilgan qo‘shimchaga asosan «Basharti, pora olish-berishda vositachilik qilgan shaxs jinoiy harakatlarni sodir etganidan keyin bu haqda o‘ttiz sutka mobaynida o‘z ixtiyori bilan arz qilsa, chin ko‘ngildan pushaymon bo‘lib, jinoyatni ochishda faol yordam bergan bo‘lsa, javobgarlikdan ozod qilinadi». Yani, pora bergan va pora olish-berishda vositachilik qilgan shaxsning o‘z aybiga iqror bo‘lib xabar berishi ushbu og‘ir jinoyatning payiri qirqishga xizmat qiladi.Bundan tashqari muxtaram prezidentimiz Shavkat Mirziyoyev 2017 yil 3 yanvar kuni “Korrupsiyaga qarshi kurashish to‘g‘risida”gi qonunni imzolangan. Ushbu qonunning maqsadi korrupsiyaga qarshi kurash sohasidagi munosabatlarini tartibga solishdan iborat.Tadbir savol – javob tarzida davom ettirildi. Talabalar o‘zlarini qiziqtirgan barcha  savollarga  javob oldilar.