2025-yil 18-dekabr kuni Buxoro davlat universiteti xodimlari ishtirokida Raqamli ta’lim texnologiyalari departamenti tomonidan “Kibermadaniyatni yuksaltirish va kibergigiyenani shakllantirish” mavzusida targ‘ibot-tashviqot uchrashuvi bo‘lib o‘tdi.
Uchrashuv davomida ishtirokchilarga zamonaviy axborot-kommunikatsiya texnologiyalaridan foydalanishda kiberxavfsizlik qoidalariga qat’iy rioya etish, shaxsiy va xizmatga oid ma’lumotlarni himoyalash, noma’lum manbalardan kelgan fayllarni ochmaslik, elektron pochta va messenjerlar orqali yuborilayotgan shubhali havolalarga kirmaslik, fishing va kiberfiribgarlik holatlaridan ehtiyot bo‘lish bo‘yicha batafsil tushunchalar berildi.
Shuningdek, bank kartalaridan xavfsiz foydalanish, karta rekvizitlari, SMS-kodlar va bir martalik parollarni begonalarga bermaslik, internet orqali to‘lovlarni amalga oshirishda ishonchli platformalardan foydalanish, shuningdek, noma’lum raqamlardan kelayotgan qo‘ng‘iroqlar va xabarlarga ishonmaslik masalalariga alohida e’tibor qaratildi.
Bundan tashqari, ijtimoiy tarmoqlardan mas’uliyatli foydalanish, soxta axborot va zararli kontentlarning oldini olish, xizmat va shaxsiy kompyuter hamda mobil qurilmalarda axborot xavfsizligini ta’minlash yo‘llari amaliy misollar orqali tushuntirildi.
Uchrashuv yakunida ishtirokchilarning savollariga mutaxassislar tomonidan atroflicha javoblar berilib, kibermadaniyat va kibergigiyena ko‘nikmalarini kundalik faoliyatda qo‘llash bo‘yicha tavsiyalar berildi. Mazkur uchrashuv xodimlarning raqamli savodxonligini oshirish hamda axborot xavfsizligini mustahkamlashga xizmat qildi.
