Tadbirni Yoshlar ma’naviy yuksaltirishiga ko‘maklashish departamenti boshlig‘i A.A.Amonov kirish so‘zi bilan ochib, bugungi kunda jamiyatimizda axborot texnologiyalari mislsiz sur’atlarda rivojlanayotgani, shu bilan birga axborot xavfsizligi va kiberxavfsizlik bilan bog‘liq muammolar ham tobora dolzarblashib borayotganini ta’kidladi. U mazkur yo‘nalishlar nafaqat mahalliy, balki global miqyosda ham jiddiy e’tibor va samarali yechim talab qiladigan masalalar sirasiga kirishini qayd etdi.
Shundan so‘ng, Buxoro davlat universiteti Raqamli ta’lim texnologiyalari departamenti boshlig‘i M.Z.Xusenov so‘zga chiqib, universitetda raqamli ta’lim texnologiyalarini joriy etish jarayonlari, ushbu yo‘nalishda amalga oshirilayotgan ishlar va sohadagi yangiliklar haqida batafsil ma’lumot berdi.
Shuningdek, u professor-o‘qituvchilar, xodimlar va talabalarga yaratilayotgan zamonaviy imkoniyatlar hamda raqamli tizimlarni joriy etish bilan bog‘liq normativ-me’yoriy hujjatlar mazmuni haqida to‘xtalib o‘tdi. U, shuningdek, 2022-yil 15-aprelda qabul qilinib, 2022-yil 17-iyuldan kuchga kirgan “Kiberxavfsizlik to‘g‘risida”gi Qonunning mazmun-mohiyati, jamiyatda axborot xavfsizligini ta’minlashdagi o‘rni va ahamiyati yuzasidan ham atroflicha tushuntirish berdi.
RTT departamentining AXT bo‘yicha mas’ul xodimi R.N.Salimov o‘z taqdimotida axborot xavfsizligi, xavfsizlikka tahdidlar, axborotni himoya qilish masalalari, tahdidlarning turlari va ularning yuzaga kelishida inson omilining o‘rni, shuningdek, universitetda axborot xavfsizligini ta’minlash bo‘yicha amalga oshirilayotgan chora-tadbirlar haqida batafsil ma’lumot berib, internet va ijtimoiy tarmoqlardan xavfsiz foydalanish, bank kartalaridagi mablag‘larni himoyalashning sodda usullari, shuningdek “1xBet”, “Mostbet”, “Linebet” kabi tavakkalchilikka asoslangan o‘yinlarning inson ongiga salbiy ta’siri haqida ham tushuntirishlar olib bordi.
Tadbir davomida ishtirokchilarga internet va ijtimoiy tarmoqlardan foydalanish madaniyatini shakllantirish, elektron to‘lov vositalaridan xavfsiz foydalanish, shaxsga doir ma’lumotlarni ishonchli himoya qilish hamda ulardan noqonuniy foydalanilishining oldini olish bo‘yicha batafsil tushuntirishlar berildi. Shuningdek, boshqalarning shaxsiy ma’lumotlarini noqonuniy to‘plash va undan foydalanish orqali sodir etilishi mumkin bo‘lgan tovlamachilik va kiberzo‘ravonlik holatlarining oldini olish, taqiqlangan kontentlarga nisbatan “raqamli immunitet”ni shakllantirishning ahamiyati yoritib berildi. Tadbir ishtirokchilari uchun amaliy tavsiyalar ham taqdim etilib, ularning kibermadaniyat bo‘yicha savodxonligi yanada mustahkamlandi.
Mazkur tadbirlar orqali xodimlar va yoshlarning raqamli savodxonligini oshirish, ularni kiberxavfsizlik madaniyatiga yo‘naltirish va axborot makonida mas’uliyatli bo‘lishini ta’minlash maqsad qilingan ekanligi to‘g‘risida V.H.Nusratov so‘z olib bordi.
Tadbir qizg‘in bahs va munozaralarga boy bo‘lib, ishtirokchilarning mavzu yuzasidan fikr, taklif va mulohazalari tinglandi hamda inobatga olindi. Ularga RTT departamenti boshlig‘i M.Z.Xusenov va departament xodimi R.N.Salimov tomonidan atroflicha javoblar berildi.
