Buxoro viloyati Ichki ishlar boshqarmasi Axborot texnologiyalari sohasidagi jinoyatlarga qarshi kurashish boshqarmasi xodimlari hamda Buxoro davlat universiteti (BuxDU) Raqamli ta'lim texnologiyalari departamenti hamkorligida Tabiiy fanlar va agrobiotexnologiya fakulteti talabalari ishtirokida kiberxavfsizlik bo‘yicha targ‘ibot tadbiri o‘tkazildi.
Tadbir davomida talabalar bilan internet tarmoqlaridan to‘g‘ri va xavfsiz foydalanish, shaxsiy ma’lumotlarni himoya qilish, onlayn firibgarlik va kiberhujumlardan himoyalanish, shuningdek, ijtimoiy tarmoqlarda mas’uliyat bilan harakat qilish madaniyati haqida chuqur suhbat olib borildi.
Mutaxassislar talabalarni raqamli makonda ehtiyotkor bo‘lish, noma’lum havolalar va fayllardan foydalanmaslik, shaxsiy ma’lumotlarini begona shaxslarga oshkor qilmaslik hamda kibergigiyena qoidalariga rioya qilish bo‘yicha amaliy maslahatlar bilan tanishtirdi.
Mazkur tadbirning asosiy maqsadi — yoshlarni raqamli xavfsizlik madaniyati bilan tanishtirish, ularni internet makonida mas’uliyatli va hushyor foydalanuvchilarga aylantirish, shuningdek, kiberxavfsizlikning ahamiyatini targ‘ib qilishdan iborat bo‘ldi.
Tadbir ishtirokchilari o‘z navbatida, o‘rganilgan bilim va tavsiyalarni kundalik hayotda qo‘llashga tayyor ekanliklarini ta’kidlashdi.
