Oliy ta’limdan keyingi ta’lim instituti huzurida an’anaviy tarzda o‘tkazib kelinayotgan “Ilm-fan va innovatsiyalar kuni” doirasida doktorantlar va tayanch doktorantlar uchun navbatdagi ilmiy-amaliy seminar tashkil etildi.
Mazkur seminarni BuxDU Ilmiy ishlar va innovatsiyalar bo‘yicha prorektori Kamoliddin Samiyev ochib berdi. O‘z nutqida prorektor oliy ta’limdan keyingi ta’lim tizimida amalga oshirilayotgan islohotlar, xususan, doktorantlarning o‘qish jarayonlari kredit-modul tizimi asosida tashkil etilayotganligi, "Research Methodology va Academic Writing" fanlarining joriy etilishi, kursdan-kursga ko‘chirish jarayonlari aynan ushbu fanlar natijalari asosida amalga oshirilishi haqida batafsil ma’lumot berdi. Shuningdek, doktorantlarning o‘quv jarayonidagi kelib-ketish holatlari, intizom va mas’uliyat masalalariga ham alohida to‘xtalib o‘tdi.
Seminarning asosiy qismida Buxoro davlat universitetining Korrupsiyaga qarshi kurashish “Komplaens-nazorat” tizimini boshqarish bo‘limi boshlig‘i Yorqin Quliyev tomonidan “Korrupsiyaga qarshi kurashda preventiv mexanizm sifatida komplaens-nazorat tizimi” mavzusida ma’ruza qilindi. Ma’ruza davomida komplaens-nazorat tizimining mazmun-mohiyati, uning ta’lim va ilmiy muassasalarda shaffoflikni ta’minlash, korrupsion xavflarning oldini olish hamda boshqaruv samaradorligini oshirishdagi muhim o‘rni haqida atroflicha tushunchalar berildi.
Shuningdek, ma’ruzada O‘zbekiston Respublikasi Prezidenti Shavkat Miromonovich Mirziyoyevning Murojaatnomalarida mamlakatimizda korrupsiyaning oldini olish va unga qarshi kurashish, davlat va jamiyat qurilishining barcha sohalarida korrupsion omillarga chek qo‘yishga qaratilgan tizimli islohotlar izchil amalga oshirilayotgani alohida ta’kidlandi. Bu borada so‘nggi yillarda qabul qilingan normativ-huquqiy hujjatlar va davlat dasturlari korrupsiyaga qarshi kurashish bo‘yicha aniq va samarali mexanizmlarni shakllantirishga xizmat qilayotgani qayd etildi.
Shuningdek, seminarda Ilmiy-innovatsion ishlanmalarni tijoratlashtirish bo‘limi boshlig‘i Oybek Sayfullayevning “Akademik harakatchanlik” dasturi imkoniyatlari, tanlovda ishtirok etish tartibi hamda ushbu dastur doirasida yosh olimlar uchun yaratilayotgan ilmiy imkoniyatlar yuzasidan atroflicha ma’lumoti taqdim etildi. Xususan, ilmiy tashkilotlar va oliy ta’lim muassasalarining noyob ilmiy obyektlari, zamonaviy ilmiy laboratoriyalar hamda tajriba-konstruktorlik byurolarida ilmiy tadqiqotlar olib borish imkoniyatlari yoritib berildi.
Seminar davomida ishtirokchilar o‘zlarini qiziqtirgan savollarga batafsil javoblar oldilar va muhim taklif hamda fikrlar bildirildi. Tadbir doktorantlar va tayanch doktorantlar uchun ilmiy faoliyatni samarali tashkil etish, ilmiy salohiyatni oshirishga xizmat qilishi bilan ahamiyatli bo‘ldi.
