Bugun Buxoro davlat universitetida korrupsiyaga qarshi kurashishga qaratilgan muhim ma’rifiy tadbir bo‘lib o‘tdi. “Yangi O‘zbekiston yoshlari korrupsiyaga yo‘l qo‘ymaydi!” shiori ostida tashkil etilgan ushbu uchrashuvda jamiyat taraqqiyotiga to‘sqinlik qiluvchi korrupsion holatlarning oldini olish, yoshlar ongida halollik tamoyillarini mustahkamlash masalalari keng yoritildi.
Tadbir doirasida universitet bosh foyesida mavzuga oid maxsus ko‘rgazma tashkil etilib, unda korrupsiyaga qarshi kurash bo‘yicha amaldagi mexanizmlar, statistik ko‘rsatkichlar va targ‘ibot materiallari namoyish etildi.
Ochilish marosimida Buxoro davlat universiteti rektori Obidjon Xamidov so‘zga chiqib, korrupsiyaning nafaqat davlat boshqaruvi, balki ta’lim jarayoniga salbiy ta’siri, uni bartaraf etishda yoshlarning faol pozitsiyasi muhimligini ta’kidlab o‘tdi. Shuningdek, Korrupsiyaga qarshi kurashish “Komplaens-nazorat” tizimini boshqarish bo‘limi boshlig‘i Yorqin Quliyev ma’ruzasi ham ishtirokchilarda katta qiziqish uyg‘otdi.
Tadbirda BuxDU rahbariyati, professor-o‘qituvchilar, talaba-yoshlar hamda uzoq yillar Vatanning tinchligi yo‘lida xizmat qilgan jangchi faxriylar — Mayor Amon Eshonqulov, Ismoil Sharipov va Gulmurod Najmiddinov ishtirok etdilar.
Tadbirda sahna ko‘rinishi namoyish etildi, shuningdek, yosh ijrochilar tomonidan qo‘shiq va raqslar ijro etilib, tadbirga ma’rifiy va madaniy ruh bag‘ishlandi.
