Buxoro davlat universitetida rektor va magistratura talabalari ishtirokida ochiq muloqot uchrashuvi bo‘lib o‘tdi. Unda BuxDU rektori Obidjon Xamidov Prezidentimiz Shavkat Mirziyoyevning yoshlar bilan o‘tkazgan ochiq muloqotida belgilangan ustuvor vazifalar mazmun-mohiyatiga to‘xtalib o‘tdi.
Shuningdek, muloqot davomida startap loyihalarni qo‘llab-quvvatlash, ilmiy natijadorlikka erishish, bitiruvchilar bandligini ta’minlash, xorijiy tillarni puxta egallash, axborot texnologiyalari va sun’iy intellektdan samarali hamda mas’uliyatli foydalanish, xalqaro ilmiy va ta’limiy tadbirlarda faol ishtirok etish kabi dolzarb masalalar muhokama qilindi. Rektor tomonidan magistrantlarning tashabbuskorligi, innovatsion fikrlashi va amaliy natijaga yo‘naltirilgan ilmiy faoliyati ustuvor vazifa ekani alohida ta’kidlandi.
Bitiruvchilar bandligini ta’minlash maqsadida O‘zmilliybank AJ Buxoro viloyat bosh boshqarmasi qoshidagi “Kelajakka qadam” markazi mutaxassislari ishtirokida magistratura talabalari uchun amaliy muloqot tashkil etildi. Tadbir BuxDU magistratura bo‘limi boshlig‘i Dilshod Yavmutov tomonidan tashkillashtirildi.
Shuningdek, Korrupsiyaga qarshi kurashish “Komplaens-nazorat” tizimini boshqarish bo‘limi boshlig‘i Yorqin Quliyev so‘zga chiqib, akademik halollik, shaffoflik va mas’uliyat masalalariga to‘xtaldi. O‘quv ishlari bo‘yicha prorektor Rustam Jumayev esa o‘quv jarayonlari hamda kontrakt masalalari yuzasidan zarur tushuntirishlar berdi.
Magistrantlar uchrashuv davomida o‘z ilmiy yutuqlari, innovatsion tashabbuslari va amaliy takliflari bilan faol ishtirok etdilar. Muloqot ochiq va konstruktiv ruhda tashkil etilib, talabalarni qiziqtirgan hamda o‘ylantirayotgan masalalar yuzasidan batafsil va asosli javoblar berildi.
