Huquqbuzarlikka toqatsizlik va ogohlik — davr talabi
Buxoro davlat universiteti Iqtisodiyot va turizm fakultetida “Mamlakat kelajagi – qonunga itoatkor va huquqbuzarlikka toqatsiz yoshlar bilan” mavzusida ma’naviy-ma’rifiy uchrashuv bo‘lib o‘tdi. Tadbir viloyat Adliya boshqarmasi mas’ul xodimlari Javohir Abdurashidov va Behzod Raxmonov, universitet Ta'lim sifati nazorati bo'limi bosh mutaxassisi F. Saidqulova hamda Yoshlarni ma’naviy yuksalishiga ko‘maklashish departamenti hamkorligida tashkil etildi.
Muloqotning asosiy maqsadi:
Talaba-yoshlar o‘rtasida qonun ustuvorligini ta’minlash va huquqiy madaniyatni yuksaltirish;
Huquqbuzarlik hamda jinoyatchilikning barvaqt oldini olish;
Yoshlarda yot g‘oyalarga nisbatan mafkuraviy immunitetni shakllantirish.
Uchrashuv davomida mutaxassislar tomonidan mamlakatimizda yoshlar uchun yaratilayotgan keng ko‘lamli imkoniyatlar, qonunlarga rioya etishning hayotiy ahamiyati hamda huquqbuzarliklar keltirib chiqaradigan salbiy oqibatlar misollar yordamida tushuntirildi. Shuningdek, internet va ijtimoiy tarmoqlardan foydalanishda kiberxavfsizlik qoidalariga rioya etish zarurligiga alohida to‘xtalib o‘tildi.
Ochiq muloqot tarzida o‘tgan tadbirda talabalar o‘zlarini qiziqtirgan huquqiy masalalar yuzasidan mutaxassislardan batafsil javoblar olishdi. Bu kabi uchrashuvlar yoshlarning jamiyatda faol, mas’uliyatli va qonunlarga itoatkor shaxs bo‘lib kamol topishiga xizmat qiladi.
