Vladimir Lvovich Kvint - taniqli iqtisodchi, strategik rejalashtiruvchi, professor va AQSh Milliy fanlar akademiyasining a'zosi. U dunyoning yetakchi universitetlari va ilmiy-tadqiqot muassasalarida, jumladan Garvard universiteti, Moskva davlat xalqaro munosabatlar instituti (MGIMO), Moskva davlat universiteti (MSU) va boshqa ko‘plab nufuzli oliy ta’lim muassasalarida ishlagan. Kvintning tadqiqotlari jahon iqtisodiyoti, strategik rejalashtirish, xalqaro menejment va iqtisodiy rivojlanishga qaratilgan. Uning “Strategik rejalashtirish”, “Raqobat ustunligi” va boshqa ko‘plab kitoblari ilmiy jamoatchilik va tadbirkorlar tomonidan keng o‘rganilib, yuksak baholanmoqda.
2024-yil 31-oktabr kuni bu olim Buxoro davlat universitetiga tashrif buyurdi. Buxoro davlat universiteti rektori Obidjon Hamidov mehmonni qutlab, universitetda talabalarning bilim olishi uchun yaratilgan shart-sharoitlar, Buxoro davlat universitetining Ofis-Registrator markazi, faollar yig‘ilishi haqida batafsil ma’lumot berdi.
Kvintning Buxoro davlat universitetining Iqtisodiyot va turizm fakulteti professor-o‘qituvchilari bilan uchrashuvi muhim voqealardan biridir. Uchrashuvda iqtisodiyotni rivojlantirish va strategik rejalashtirish sohasidagi bilim va tajribasi bilan o‘rtoqlashdi. Shuningdek, u strategik rivojlanish yo‘nalishlarida amalga oshirilishi lozim bo‘lgan qadamlarga e’tibor qaratdi.
Professor Kvint o‘z nutqida Buxoro viloyati va O‘zbekistonning iqtisodiy rivojlanishi imkoniyatlari haqida to‘xtalib o‘tdi, shuningdek, strategik rejalashtirishning zamonaviy usullari va raqobatbardoshligini oshirish bo‘yicha tavsiyalar berdi. Shu bilan birga, u iqtisodiyot sohasida jahon tajribasiga tayangan holda, iqtisodiy islohotlarning milliy iqtisodiyotga ijobiy ta'sirini ham ko'rsatdi.
Bu uchrashuv, o‘z navbatida, talaba-yoshlar, professor-o‘qituvchilar uchun xalqaro tajribani o‘rganish, uni amaliyotda qo‘llash bo‘yicha yangi ko‘nikmalarni shakllantirish imkoniyatini yaratdi. Kvint bilan ushbu ilmiy muloqot Buxoro davlat universitetining ilmiy izlanishlari va amaliy rivojlanishiga katta hissa qo‘shishi kutilmoqda.
