XXI asrning uchinchi o‘n yilligiga kelib chuqur ijobiy o‘zgarishlar xalqimizning turmush tarziga, ijtimoiy-siyosiy, madaniy-ma’rifiy, huquqiy-mafkuraviy qarashlariga shiddat bilan kirib borayotganligiga guvohmiz. Milliy istiqlol sharofati bilan sodir bo‘layotgan tub siljishlar, mislsiz o‘zgarishlar O‘zbekiston deb atalmish yaratganning mehri tushgan firdavsmonand yurtimizning, yurtdoshlarimizning milliy-madaniy qiyofasini, dunyoqarashini o‘zgartirib yubordi. Zero, xalqning ozodlikka, tinch-totuvlikka va baxt-saodatga azaliy intilishi, davlatning barqarorligi, millatning o‘z taqdirini o‘zi belgilashdek yuksak huquqqa, azm-u qarorga ega bo‘lishi, shu xalqqa mansub har bir insonning erkin yashash zavqidan bahramandligi – bularning barchasini harakatga keltiruvchi asosiy kuch yurtning qo‘lga kiritgan mustaqilligi sharofatidir.Jonajon O‘zbekistonimiz yurt osoyishtaligini saqlagan holda parlament yo‘li bilan huquqiy mustaqil davlatga aylangan kun o‘zbek xalqining tarixiy yilnomasiga zarhal harflar bilan yozildi. Ajdodlar armoniga aylangan orzuga biz erishgan ekanmiz, endigi vazifamiz, zimmamizdagi ulkan mas’uliyatimiz MUSTAQILLIK deb atalmish beqiyos ne’matni jonimizdan ko‘proq avaylab, avlodlarga yetkazib berishimiz va, ayni paytda, farzandlarimizga, shogirdlarimizga, ta’lim-tarbiya berayotgan yoshlarimizga bu ne’matni ko‘z qorachig‘iday asramoqni, uning gurkirashi uchun doimiy harakatda bo‘lmoq zarurligini singdirishimiz shart.Avvalambor, yurtning siyosiy mustaqilligi – o‘zining yaxlit hududiy daxlsiz chegarasiga ega ekanligi va shu yurt roziligisiz uning chegara hamda hududini o‘zgartirib bo‘lmasligi bilan belgilanishini bilamiz. Yurt mustaqilligi, mustaqil xalqning xohish-irodasi, yashash tarzining ifodasi – ramzi, uning konstitutsiyasi, bayrog‘i, gerbi, madhiyasi, pul birligi kabilarga egaligi bilan xarakterlanadi. Shukurki, bugun ona O‘zbekistonimiz mazkur ramzlarning barchasiga ega.Istiqlolga erishgan mamlakatimiz mustaqillikning ilk kunlarida o‘z taraqqiyot yo‘lini izlagan bo‘lsa, bugun milliy qadriyatlarimiz, an’ana-yu urf-odatlarimiz, turmush tarzimizga mos, ayni damda, jahon hamjamiyatida o‘z o‘rniga ega yangi farovon jamiyat barpo etish andozasini ishlab chiqishga erisha oldi.Tarix saboqlari turli xalqlar o‘z davlatchiligining shakllanish bosqichini ijtimoiy, iqtisodiy va tarixiy-madaniy vaziyatlarga bog‘liq holda turli tarixiy davrlarda bosib o‘tganligini ko‘rsatadi. Zero, yer yuzida o‘z davlatchiligini hech qachon yarata olmagan elatlar, qabilalar ham mavjud. Ularning ijtimoiy-iqtisodiy hayoti, bir o‘rinda depinib turgandek, urug‘ va qabilaning ma’naviy o‘lchamlari, urug‘ boshliqlarining obro‘-e’tibori bilan boshqarilmoqda. Zotan, istalgan xalq, istalgan millatning taraqqiyoti, sivilizatsiyasi, avvalo, davlatchilik tuzilmasining yuksalishi bilan chambarchas bog‘lanadi. O‘zbeklar «Avesto»lar yaratilgan davrlarda ham o‘z davlatchiligiga ega bo‘lgan xalqlardan biri bo‘lganligiga tarix guvoh.Tarixiy taraqqiyot davomida jahon va o‘zimizning amaliyotimizdan o‘tgan barcha sermahsul tajribalarni rad etmagan holda o‘z ijtimoiy-iqtisodiy va siyosiy-huquqiy taraqqiyot yo‘lini tanlay oldik, desak mubolag‘a bo‘lmaydi. Fikrimizni yurtimizda Uchinchi Renessans davrining boshlanganligi ham yorqin dalillaydi. Butun o‘zbek xalqi ijtimoiy taraqqiyotga, munosib turmush sharoitiga intilayotganligi, bularning yurtboshimiz tomonidan yetarlicha qo‘llab-quvvatlanayotganligi, tom ma’noda, yurtimiz rahbarining har qanday og‘ir sharoitga qaramay, O‘zbekistonni dadil, mustaqil yo‘ldan yetaklab borayotganligi qalblarimizni to‘lqinlantiradi.Bir paytlar sobiq sho‘rolar davri butun respublikamizni dunyo tamaddunidan uzib qo‘ygan bo‘lsa, istiqloldan so‘ng, O‘zbekiston teng manfaatlar asosida dunyo davlatlari bilan barcha sohalarda hamkorlikni yo‘lga qo‘ya oldiki, bu yurtimizda olib borilayotgan to‘g‘ri siyosatning mahsulidir.Mamlakatimizning jahon hamjamiyatiga intilishi shunchaki integratsiyaga erishish uchun emas, bir vaqtlar Amir Temur bobomiz egallagan dunyoning yarmiga ustun bo‘lib olish yoki o‘z ta’sir doiramizni kengaytirishga ham emas, balki millatimizning millat, xalqimizning xalq sifatida farovon, barqaror va tinch yashamog‘i uchun muhimdir.Ayni kunda O‘zbekiston Respublikasining davlat ramzlaridan biri, g‘urur va iftixorimiz ifodachisi bo‘lgan yurt bayrog‘ining qabul qilinganligiga o‘ttiz yil to‘ldi. Yurt bayrog‘i – mamlakatimizning suvereniteti va mustaqilligini ifodalovchi muqaddas timsol.Bugun yurtimiz bayrog‘i nafaqat respublikamiz hududlarida, Birlashgan Millatlar Tashkiloti binosi oldida, ikki yuzga yaqin xorijiy mamlakatlarning elchixonalarida, diplomatik vakolatxonalari va konsullik muassasalarida O‘zbekistonning davlat ramzi, xalqimizning shon-sharafi, tarixiy xotirasi va intilishlarini o‘zida mujassam etgan, o‘zini o‘zbekman deb bilgan har bir millatdoshimiz qalbiga g‘urur, faxr va iftixor bag‘ishlaydigan tug‘ sifatida hilpirab turibdi.Barcha millatdoshlarimiz, yurtdoshlarimiz uchun vatanimizning muqaddas ramzi bo‘lmish davlat bayrog‘i aziz va qadrdon. O‘zida ulkan ma’no-mazmunni mujassam etgan, yuksak did va mahorat bilan puxta ishlangan, ona xalqimizning azaliy orzu-istaklarini, g‘ayrat-shijoatini, xalqimizga xos bag‘rikenglik, mehmondo‘stlikni, ajdodlar yodi hamda millat g‘ururini mujassam etgan bayrog‘imiz, avvalo, milliy ma’naviyatimizning eng muhim timsoli sifatida mangu hilpirayversin!Aziz xalqimizga O‘zbekiston Respublikasining bayrog‘i qabul qilingan kun muborak bo‘lsin!Obidjon Xafizovich Xamidov,Buxoro davlat universiteti rektori,Iqtisod fanlari doktori, professor
