Yoshlar va rahbarlar oʼrtasida erkin fikr almashish, iqtidorli va bilimli yoshlarni aniqlash, shuningdek yoshlarni oʼz fikr va gʼoyalarini erkin bildirishga imkoniyat yaratish maqsadida 21 iyun kuni soat 12:00 da Buxoro viloyati Gʼijduvon tumani hokimligi binosida “Vazir, hokim va yoshlar” uchrashuvi oʼtkazildi. Uchrashuvda Buxoro davlat universiteti ilmiy ishlar va innovatsiyalar boʼyicha prorektori, i.f.d. (DSc), dots. O.S. Qahhorov boshchiligida universitet yosh olimlari, tadqiqotchilari hamda iqtidorli talabalari ham ishtirok etishdi. Uchrashuvni Gʼijduvon tumani hokimi M.А. Umarov ochib berdi. M.А. Umarov tumanda yoshlar bandligini taʼminlash va boʼsh vaqtlarini mazmunli tashkil etish boʼyicha olib borilayotgan ishlar toʼgʼrisida maʼruza qildi. Yoshlar ishlari agentligi Buxoro viloyat boshqarmasi boshligʼi I.I. Ziyodullaev soʼzga chiqib, yoshlarga yaratilayotgan sharoitlar hamda berilayotgan imtiyozlar toʼgʼrisida nutq soʼzladi.Shundan soʼng soʼz navbati Oʼzbekiston Respublikasi Innovatsion rivojlanish vaziri akademik I.Yu. Аbduraxmonovga berildi. Vazir yoshlarga har qanday sharoitda ham bilim olishdan toʼxtab qolmaslik kerakligini, har bir inson oʼziga berilgan iqtidorni yuzaga chiqarish uchun harakat qilishi lozimligini, Oʼzbekiston yoshlarining bilim va koʼnikmalari xorijiy tengdoshlariga nisbatan kam emasligini taʼkidlab oʼtdi. Vazir yoshlarga murojaat qilib amalga oshirishni moʼljallab turgan loyihalari toʼgʼrisida soʼradi. Har bir loyiha va gʼoya egasi bilan muloqot qilib, loyihalar yuzasidan kerakli yoʼnalishlarni koʼrsatdi. Xususan. universitet Аmaliy matematika va dasturlash texnologiyalari kafedrasi oʼqituvchisi N.X. Ergashev tomonidan ishlab chiqilgan “Int42h” blokcheyn texnologiyasidan foydalangan holda sunʼiy intellektga asoslangan onlayn kurslar uchun platforma ishlab chiqish” loyihasi vazirda hamda yigʼilganlarda qiziqish uygʼotdi. Vazir sunʼiy intellekt sohasida amalga oshirilayotgan ishlarni ijobiy baholadi. Ushbu loyihani oʼrnatilgan tartibda koʼrib chiqish uchun kerakli topshiriqlarni berdi. Uchrashuv soʼngida faol ishtirokchilarga esdalik sovgʼalari berildi. Muddatidan oldin doktorlik dissertatsiyalarini himoya qilgan tayanch doktorantlar (PhD)ga sertifikatlar taqdim etildi.BuxDU Matbuot xizmati