Shu yilning 12-14 noyabr kunlari Buxoro shahrida Respublika OTMlari professor-oʼqituvchilari oʼrtasida “Sport – salomatlik garovi” shiori ostida sportning badminton, stol tennis va shaxmat turlari boʼyicha “Doʼstlik spartakiadasi” boʼlib oʼtishi rejalashtirilgan.Ushbu spartakiada final bosqichiga ishtirok etish uchun Respublika OTMlaridan professor-oʼqituvchilar Buxoro shahriga yetib kelishdi. Mehmonlar Buxoro shahridagi Grand-Buxara mehmonxonasida joylashdilar. Mezbon OTMlar tashkilotchilari spartakiada ishtirokchilarini iliq kutib olib, ularni Buxoroi-sharifga tashrif buyurganlari bilan samimiy tilaklar bilan qutlashdi. “Doʼstlik spartakiadasi” ishtirokchilari hamda tashkilotchilari bilan mehmonxona konferents-zalida uchrashuv boʼlib oʼtdi. Ushbu uchrashuvda Respublika OTMlari professor-oʼqituvchilari, oliy hakamlar hamda Buxoro viloyati jismoniy tarbiya va sport boshqarmasi xodimlari ishtirok etdilar. Uchrashuvda “Doʼstlik spartakiadasi”ni koʼtarinki kayfiyatda oʼtkazish uchun barcha shart-sharoitlar yaratilganligi, musobaqalar oʼtadigan joylar tayyor holatda keltirilganligi, musobaqa joylariga yetib borishda transport xizmatlari yaratib berilganligi, shuningdek, musobaqa qoidalari hamda boshlanish vaqti boʼyicha maʼlumotlar berildi. Stol tennisi sport turi boʼyicha “Doʼstlik spartakiadasi” musobaqasi Buxoro shahridagi Xumo tennis majmuasida, shaxmat sport turi boʼyicha Buxoro shahridagi Shaxmatga ixtisoslashtirilgan markazda hamda badminton sport turi boʼyicha musobaqalar Buxoro muhandislik-texnika institutida oʼtkazilishi ishtirokchilarga taʼkidlab oʼtildi. Uchrashuvdan soʼng stol tennisi, badminton hamda shaxmat sport turlari boʼyicha boʼlib oʼtadigan “Doʼstlik spartakiadasining” final bosqichi qurʼa tashlash marosimi ham boʼlib oʼtdi.Buxoro davlat universiteti Matbuot kotibi Otabek Jalolov
