Ish faoliyati: 32
Pedagogik faoliyati: 32 yil
Sharipova Laylo Frunzeevna 1968 yil 11 noyabrda Buxoro viloyati Shofirkon tumani akademik I.Mo‘minov nomli jamoa xo‘jaligidagi Toshtemir qishlog‘ida ziyoli oilasida dunyoga keldi.
Laylo Sharipova o‘rta maktabni tamomlab, o‘sha yili BDPI (hozirgi BuxDU)ga o‘qishga kirdi. 1985-1990 yillar davomida Buxoro davlat pedagogika instituti o‘zbek tili va adabiyoti hamda chet tillar fakulьtetining o‘zbek tili va adabiyoti bo‘limini imtiyozli diplom bilan tamomladi. 1990 yilda o‘zbek adabiyoti kafedrasi o‘qituvchisi sifatida ish boshladi.
1995-96-yillarda “XX asr o‘zbek adabiyoti va folьklor” kafedrasi aspiranti sifatida izlandi, ilm olamiga qadam qo‘ydi. 2000-2005-yillarda "Folьklor va yangi o‘zbek adabiyoti" kafedrasining o‘qituvchisi, 2005-2006-yillarda katta o‘qituvchisi bo‘lib ishladi. Laylo Sharipova 2008 yilning 18 noyabrida "XX asrning 70-80-yillari o‘zbek she’riyatida folьklorizmlar" mavzuidagi nomzodlik dissertatsiyani himoya qildi. 2011 yilda "Fan" nashriyoti uning "XX asrning 70-80-yillari o‘zbek she’riyatida folьklorizm" nomli monografiyasini nashrdan chiqardi.
U 2011 yildan "Boshlang‘ich ta’lim asoslari" kafedrasi o‘qituvchisi bo‘ldi. 2015 yildan universitet katta ilmiy xodim izlanuvchisi bo‘ldi. 2018 yilda “Aruz saboqlari” usuliy qo‘llanmasini, 2019 yilda “She’riyat va folьklor” nomli monografiyasini, “Tahlil va talqin” adabiy-tanqidiy, publitsistik maqolalar to‘plamini nashr qildirdi. 2019 yilda “XX asrning ikkinchi yarmi o‘zbek she’riyati badiiy taraqqiyotida folьklor” mavzusida doktorlik dissertatsiyasini himoya qildi. Hozirda o‘zbek tili va adabiyoti kafedrasi dotsenti, f.f.d.
Shoira sifatida “Oq armonlar”, “Qismat surati”, “Shodlik sohili”, “Bu shunday dunyoki...”, "Onamga tortiq", “Onam o‘zing” nomli she’riy to‘plamlarini kitobxonlarga taqdim qilib, o‘z muxlislariga ega bo‘lib ulgurdi. 2016 yildan O‘zbekiston Yozuvchilar uyushmasi a’zosi.