Bugun Buxoro davlat universitetida “Ta’lim jarayoniga sun’iy intellektni integratsiya qilish strategiyasi: moslashuvdan transformatsiyagacha” mavzusida muhim seminar-trening bo‘lib o‘tdi.
Faollar yig‘ingohida o'tkazilgan seminar-treningni L.N. Gumilyov nomidagi Yevroosiyo Milliy Universiteti huzuridagi Hindiston–Qozog‘iston axborot va kommunikatsiya texnologiyalari sohasidagi Mukammallik markazi direktori, axborot-kommunikatsiya texnologiyalari bo‘yicha xalqaro ekspert, World Summit Award (WSA) bo‘yicha Qozog‘iston milliy eksperti, texnika fanlari nomzodi, professor Anatoliy Kremenchutskiy olib bordi. Mazkur tadbir BuxDU rektori Obidjon Xamidov boshchiligida tashkil etilib, unda universitet prorektorlar, fakultet dekanlari, departament va bo‘lim boshliqlari, kafedra mudirlari faol ishtirok etdilar. Seminar oliy ta’lim tizimida boshqaruv va o‘quv jarayonini zamonaviy raqamli texnologiyalar asosida takomillashtirishga qaratilgani bilan alohida ahamiyat kasb etdi.
Seminar-trening davomida sun’iy intellekt texnologiyalarini ta’lim jarayoniga joriy etishning strategik yondashuvlari, o‘quv jarayonini boshqarish va monitoring qilishda AI imkoniyatlari, ta’lim sifati va samaradorligini oshirishga qaratilgan innovatsion yechimlar hamda oliy ta’lim muassasalarida raqamli transformatsiyani amalga oshirish masalalari yuzasidan atroflicha nazariy va amaliy ma’lumotlar taqdim etildi.
Mazkur tadbir ishtirokchilarga sun’iy intellekt asosidagi zamonaviy yondashuvlarni universitet boshqaruvi va ta’lim jarayoniga tatbiq etish bo‘yicha muhim bilim va tavsiyalar berdi. Seminar-trening Buxoro davlat universitetida innovatsion ta’lim muhitini shakllantirish, raqamli texnologiyalarni keng joriy etish va ta’lim sifatini yangi bosqichga olib chiqish yo‘lidagi navbatdagi muhim qadam bo‘ldi.
