Buxoro davlat universiteti Xorijiy tillar fakulteti professor-o‘qituvchilarining Buyuk Britaniyaning Norvich shahrida, Norwich Institute for Language Education (NILE) qoshida olib borayotgan malaka oshirish dasturi keyingi haftada ham izchil davom etmoqda. “Testing, Assessment and Evaluation with Contemporary English and Advanced Teaching Methodology” nomli kurs doirasida tinglovchilar zamonaviy baholash yondashuvlari, ilg‘or metodikalar va amaliy ko‘nikmalarni chuqur o‘zlashtirishmoqda.
NILE Social Programme doirasida madaniy va ilmiy sayohatlar
Dastur doirasidagi mashg‘ulotlar nafaqat auditoriya ichida, balki NILE tomonidan tashkil etilgan Social Programme orqali ham davom ettirilmoqda. Ushbu dastur ishtirokchilarga Buyuk Britaniyaning tarixi, madaniyati va ta’lim muhitini yanada chuqurroq o‘rganish imkonini bermoqda.
Cambridge shahriga madaniy sayohat
Hafta davomida professor-o‘qituvchilar Buyuk Britaniyaning eng mashhur ilmiy markazlaridan biri — Cambridge shahriga madaniy sayohat uyushtirdilar. River Cam bo‘yida joylashgan, dunyoning eng nufuzli ta’lim maskanlaridan bo‘lgan ushbu shaharda ular:
• King’s College, Trinity College va Darwin College kabi tarixiy kollejlar bilan tanishdilar;
• Isaak Nyuton, Lord Bayron, Stiven Xoking kabi buyuk olim va adiblar hayoti bilan bog‘liq maskanlarni ko‘zdan kechirdilar;
• Fitzwilliam muzeyi, Mathematical Bridge, Chronophage soati kabi diqqatga sazovor joylarga tashrif buyurdilar;
• Britaniyaning ilmiy merosi va akademik an’analariga oid qiziqarli ma’lumotlarga ega bo‘ldilar.
Mazkur sayohat ishtirokchilarning ilmiy dunyoqarashini kengaytirib, ularning metodik va madaniy tayyorgarligini yanada boyitdi.
NILE mutaxassislari bilan bevosita muloqot, nazariy-amaliy mashg‘ulotlar va madaniy tadbirlar orqali BuxDU o‘qituvchilari xalqaro standartlarga mos ilg‘or tajribalarni amaliyotga joriy etish bo‘yicha yangi g‘oyalar va ko‘nikmalarga ega bo‘lmoqda.
