Buxoro davlat universiteti rektori Obidjon Xamidov boshchiligidagi delegatsiya Xitoy Xalq Respublikasining Nanjing Audit Universitetiga tashrif buyurdi. Tashrif doirasida tomonlar o‘rtasida ta’lim, ilm-fan va innovatsion rivojlanish bo‘yicha keng qamrovli hamkorlik masalalari muhokama qilindi.
Dastlab, universitet rahbariyati bilan o‘tkazilgan uchrashuvda ikki oliy ta’lim muassasasi o‘rtasida xalqaro aloqalarni mustahkamlash, auditorlik sohasi va raqamli texnologiyalar bo‘yicha qo‘shma tashabbuslarni yo‘lga qo‘yish yuzasidan kelishuvlarga erishildi.
Uchrashuv Nanjing Audit universiteti rahbariyati tomonidan yuqori darajada tashkillashtirildi. Muzokaralarda Nanjing Audit universiteti nomidan quyidagi mas’ullar ishtirok etdi:
Professor Lu Hualiang –universitet prezidenti, menejment yo‘nalishi professori, iqtisodiyot fanlari doktori;
Professor Li Qianwen – universitet vitse-prezidenti, biznes boshqaruvi fanlari doktori;
Ding Yanqing – xalqaro ta’lim bo‘yicha mas’ul o‘qituvchi;
Wang Fang – xalqaro almashinuvlar va hamkorlik bo‘limi direktori.
Muzokaralar jarayonida quyidagi masalalar bo‘yicha aniq kelishuvga kelindi:
BuxDUdan 5 nafar talabani Nanjing Audit universitetida semestrlik o‘qish dasturiga yuborish, shuningdek, Xitoydan ham BuxDUga talabalar qabulini tashkil etish.
Professor-o‘qituvchilar almashinuvi yo‘lga qo‘yiladi; dastlabki bosqichda Nanjing Audit universitetidan 2 nafar xorijlik professor BuxDUda “Audit jarayonlarida sun’iy intellektdan foydalanish” mavzusida darslar o‘tadi.
BuxDU talabalari uchun Nanjing Audit universitetining onlayn kutubxonasidan foydalanish imkoniyati yaratiladi.
Audit yo‘nalishida ilmiy tadqiqot olib boruvchi yosh olimlar uchun Nanjing Audit universitetida ilmiy faoliyat bilan shug‘ullanish sharoitlari taqdim etiladi.
Buxoro davlat universitetida audit jarayonlarida sun’iy intellekt bilan ishlashni o‘rgatuvchi innovatsion laboratoriya tashkil etish bo‘yicha kelishuvga erishildi.
Shuningdek, delegatsiya Nanjing Audit Universitetining xalqaro talabalar maktabi, zamonaviy o‘quv infratuzilmalari va universitet muzeyi bilan tanishdi. Uchrashuv davomida tomonlar kelgusida qo‘shma loyiha va dasturlar portfelini kengaytirish bo‘yicha o‘zaro fikr almashdilar.
Mazkur tashrif O‘zbekiston va Xitoy o‘rtasidagi ta’lim sohasidagi strategik hamkorlikni yanada rivojlantirish, BuxDUni xalqaro maydondagi o‘rnini mustahkamlashda muhim qadam bo‘lib xizmat qiladi.
