Butun dunyoda “Sharq durdonasi” deb e’tirof etilgan Buxoroga sayohat qilishga intiluvchilar ko’lami kengaymoqda. “Buxoro bo’ylab sayohat qil” shiori ostida mamlakatda ichki turizmni rivojlantirish borasida Turizmni rivojlantirish davlat qo’mitasi Buxoro viloyati hududiy boshqarmasi, Buxoro viloyati hokimligi va Buxoro davlat universiteti hamkorligida amalga oshirilayotgan chora-tadbirlar, aholi orasida sayohatga bo’lgan qiziqish ortishiga xizmat qilmoqda. Ushbu dastur doirasidaTurizm fakultetining 150 nafardan ortiq talabalari ko’ngillilar sifatida ishtirok etishmoqda. Ular sayohatchilarga ziyoratgohlar haqida ma’lumot berish, marshrut davomida yordam ko’rsatish, ko’ngilochar tadbirlarni olib borish bilan shug’ullanishmoqda.Joriy yilning 23 yanvar kuni "Aziya Global elit" turistik agentligi Olot tumani 400 kishilik mahalla jamoalarining islom olamida Naqshbandiya tariqati bo’yicha ma’lum va mashhur “Yetti pir” ziyoratgohlari, ko’hna “Ark” qal’asi, “Poyi kalon” maydoni, Mir-Arab madrasasi, “Labi-Hovuz” majmuasi, “Toqi zargaron”, “Toqi telpakfrushon” savdo markazlari va “Chor-Bakr” qadamjolariga sayohat tashkil etildi.Viloyatda yetakchi turistik tashkilotlardan biri hisoblangan “Aziya Global Elit” turistik kompaniyasi tomonidan amalga oshirilgan mazkur sayohatdan asosiy maqsad yurtimizda ichki turizmni yanada rivojlantirish, yoshlarning qadimiy tarix, madaniyat va milliy qadriyatlarni chuqur o’rganishi, bo’sh vaqtlarini maroqli va mazmunli o’tkazishi hamda ularning sayohat qilishga bo’lgan ko’nikmalarini shakllantirish uchun qulay shart-sharoitlar yaratishdan iborat. Sayohatchilar maroqli dasturga muvofiq bir kecha “Grand Buxoro” mehmonxonasida dam olishdi. Ilk bor sayohatga chiqqan mahalla sayyohlari qiziqarli dastur asosida “Yetti pir” qadamjolarini to’liq ziyorat qilish va qadimiy “Ark” qo’rg’oni va Minorai-Kalonning betakror arxitekturasi hamda ulardagi noyob eksponatlarni tomosha qilishib, ulug’ ajdodlarimizning san’at, madaniyat va ilm-fan rivoji yo’lida yaratgan bebaho asarlaridan bahramand bo’lish baxtiga muyassar bo’lganligini e’tirof etishmoqda. Sayohatdan chuqur taassurot olgan mahalla vakillari a’lo kayfiyat bilan barcha tashkilotchilarga o’zlarining minnatdorchiligini bildirishdi. Olot tumani 400 kishilik mahalla jamoalari sayohati davom etmoqda.
