Xabar berganimizdek, joriy yilning 22-30-sentabr kunlari Buxoro davlat universitetida Italiyada joylashgan Abdus Salam nomidagi Nazariy fizika xalqaro markazi, Toshkent shahridagi Turin Politexnika universiteti va O‘zbekiston fizika jamiyati hamkorligida tashkil etilgan “Zamonaviy kvant fanidagi yangi tendensiyalar: yangi funksional materiallardan kvant texnologiyalarigacha” mavzusidagi xalqaro yozgi maktab o'tkazilmoqda.
Buxoro davlat universiteti iqtidorli talabalari, magistrlari, doktorantlari va yosh tadqiqotchi olimlari uchun Italiyada joylashgan Abdus Salam nomidagi nazariy fizika xalqaro markazi (ICTP) professori Mixail Kiselyov ishtirokida xalqaro seminar treyning o’tkazildi.
Xalqaro seminarning birinchi qismida ICTP da o’quv jarayoni va ilmiy faoliyatning qanday yo’lga qo’yilganligi haqida ma’lumot berildi hamda yil davomida o’tkaziladigan ilmiy tadbirlar bilan tanishtirildi.
Seminarning ikkinchi qismida iqtidorli yoshlar va professor-o’qituvchilarning ilmiy tadqiqot ishlarini qo’llab-quvvatlashga qaratilgan dasturlar taqdimot qilindi. Xususan, diplom dasturi, tayanch doktorantura, qisqa va uzoq muddatli ilmiy stajirovkalar, yo’l xarajatlarini qoplashga mo’ljallangan xalqaro matematika jamiyati (IMU) grantlari haqida batafsil ma’lumot berildi.
Seminar so’ngida ishtirokchilar o’zalarini qiziqtirgan savollar bilan tadqiqotchi olim Mixail Kiselyovga murojaat qildilar hamda yetarlicha ma’lumotga ega bo’ldilar.
