2023-yil 16-iyun kuni Buxoro shahrida o‘tkazilayotgan XX an’anaviy xalqaro “Ipak va ziravorlar” festivali doirasida Buxoro davlat universiteti “Iqtisodiyot va turizm” fakul’teti professor-o‘qituvchilari tomonidan “Turistik hududlarning zamonaviy kontenti: muammo va innovatsion yechimlar” mavzusida xalqaro ilmiy-amaliy anjumani yuqori saviyada o‘tkazildi. Anjuman Buxoro davlat universiteti rektori, iqtisodiyot fanlari doktori, professor O.X.Xamidovning kirish va tabrik so‘zi bilan boshlandi. Anjuman ishida Fransiya, Rossiya, Qozog‘iston, Bolgariya va Respublikamizning turli oliy ta’lim muassasalarida faoliyat yuritayotgan tadqiqotchi olimlar o‘z ma’ruzalari bilan an’anaviy va online shaklda ishtirok etdilar. Tarix fanlari doktori, professor S.I.Inoyatov “Ipak va ziravorlar festivalining turizmni rivojlantirishdagi o‘rni” mavzusidagi ma’ruzasi anjuman qatnashchilari tomonidan katta qiziqish bilan tinglandi. Rossiya Federatsiyasi rassomlar uyushmasi a’zosi, turk xalqlari an’anaviy madaniyati tadqiqotchisi, KOKON discussion klub rahbari, Art ekspert R.A.Kashakova arxiv ma’lumotlari asosida Buxoro va tatarlar savdo sotiq munosabatlarining shakllanish tarixi haqida batafsil ma’lumot berib, anjuman ishtirokchilari tomonidan iliq qabul qilindi. Qozog‘istonning Yevroosiyo milliy universiteti professori L.M.Mutaliyeva va doktorant A.Berdibekovalar ZOOM platformasi orqali “Hududiy turizmni rivojlantirishda festivallarning ta’siri, Ostona shahri misolida” mavzusida taqdimot qildilar. Buxoro merosi ilmiy-tadqiqot markazi direktori, tarix fanlari doktori, professor R.V.Almeyev Ipak va ziravorlar festivalining turizm taraqqiyotidagi ahamiyati haqida so‘zlab, ishtirokchilarning diqqatini o‘ziga jalb etdi. Kanadalik fransuzzabon mutaxassis V.Jelina Buxoro davlat universitetida fransuz tilini o‘rgatishni qo‘llab-quvvatlash bo‘yicha amalga oshirilgan ishlar haqida ma’ruza qilib, tillarni bilish turistlarga xalqaro standartlarga asoslangan xizmatlarni ko‘rsatishda belgilovchi ahamiyat kasb etishini ta’kidlab o‘tdi. Turizmni jadal rivojlantirish bo‘yicha chora-tadbirlar doirasida amalga oshirilayotgan maqsadli, amaliy loyihalar to‘g‘risida Iqtisodiyot va turizm fakulteti dekani, iqtisodiyot fanlari nomzodi, dotsent D.Sh.Yavmutov, Turizm va mehmonxona xo‘jaligi kafedrasi mudiri, iqtisodiyot fanlari doktori, professor N.S.Ibragimov hamda Marketing va menegment kafedrasi mudiri, iqtisodiyot fanlari bo‘yicha falsafa doktori J.R.Toxirovlar o‘z taqdimotlarini anjuman ishtirokchilari e’tiboriga havola qildilar. Anjuman qizg‘in bahs-munozaralar bilan o‘tdi. Muhokamalar davomida Buxoro davlat universiteti bilan xorijlik ishtirokchilar o‘rtasida kelgusidagi hamkorlik yo‘nalishlari belgilab olindi. Anjuman so‘ngida ishtirokchilarga sertifikat va tarqatma materiallar taqdim qilindi.
Buxoro davlat universiteti ilmiy ishlar va innovatsiyalar bo‘yicha prorektori T.H.Rasulov
