Buxoro davlat universiteti katta faollar zalida Vobkent tuman hokimi Umarov Farhod Baqoyevich va Buxoro viloyat OTMlari bakalavr ta’lim yoʻnalishlari va magistratura mutaxassisliklari bitiruvchilari ishtirokida “Tuman hokimi va yoshlar uchrashuvi” boʻlib oʻtdi. Tadbirda Buxoro davlat universitetidan 72 nafar, Buxoro Muhandislik texnologiyalari institutidan 29 nafar, Buxoro davlat Tibbiyot institutidan 7 nafar, jami 108 nafarbitiruvchi ishtirok etdi.
Tadbirni universitet universitet rektori Obidjon Xamidov ochib berdi va har qanday savol yoki murojaatlar boʻlsa bemalol tortinmasdan berishini, barchasi joyida yoki mas’ullar ishtirokida tuman miqyosida hal etilishini bildirib navbatni tuman hokimiga berdi.
Tuman hokimi soʻzga chiqib, yangi foydalanishga topshirilgan maktab va maktabgacha ta’lim tashkilotlari, ishlab chiqarish korxonalari haqida ma’lumot berdi. Boʻsh ish oʻrinlari mavjudligini ma’lum qilib, kimda qanday murojaat boʻlsa bildirishini aytdi. Bugungi tadbirga yigʻilganlarga tashakkur bildiriib davlat imtihonlari sabab kela olmaganlar uchun tuman hokimligida 26-iyundan 1-iyulga qadar 4 kun davomida qabul yana davom ettirilishini ma’lum qildi va soʻzni talabalarga berdi.
“Tarix: mamlakatlar va mintaqalar” yoʻnalishi 4-bosqich bitiruvchisi Yarashev Muhammadiso oʻtgan yili yoshlar yetakchisi lavozimiga argos sayti orqali ariza qoldirib, imtihonidan ham oʻtganligini, ammo, diplomi yoʻqligi uchun ishga olinmaganini, bu yil ham ariza topshirganligini, imtihonga chaqirilganliklarini bildirib qabul qilinishiga amaliy yordam berishni soʻradi. Tuman hokimining ijtimoiy masalalar boʻyicha oʻrinbosari “Talaliyon” MFYda yoshlar yetakchisiga boʻsh oʻrin borligini, qabul qilinishini ma’lum qildi;
2Buxoro Tibbiyot institutining “Tibbiy pedagogika”, “Oliy hamshiralik ishi” va “Tibbiy laboratoriya” yoʻnalishi 4 nafar bitiruvchilari tumandagi Tibbiyot birlashmasiga ishga qabul qilindi;
“Filologiya va tillarni oʻqitish: oʻzbek tili” yoʻnalishi bitiruvchisi Ibodullayeva Shaxina tumandagi 41-maktabga ish soʻrab borganida rad javobini berishganini ma’lum qilib, ish topishda koʻmak soʻradi. Tuman Maktabgacha va maktab ta’limi boʻlimi bu maktabda ish boʻlmasa ham boshqa yondosh hududlardagi maktablardan ish topib berilishini ma’lum qildi;
Bir guruh “Xorijiy tillar” yoʻnalishi bitiruvchilari tumanning Madaniyat aholi punktida oʻquv markazi ochmoqchiligini, bino topilmayotganini aytib amaliy yordam berishni soʻradi. Tuman hokimi tomonidan 18-maktabning 4 ta xonasi bepul ajratib berildi;
“Biologiya” yoʻnalishi bitiruvchisi Yoqubov Firdavs Xalq tabobati assotsiatsiyasining a’zosi ekanligini, tumanda xalq tabobatini rivojlantirish maqsadida filial ochmoqchiligini, xalq tabobatidan ta’lim berishga ham litsenziyasi borligini aytib oʻquv xonalari ajratishni soʻradi. Tuman hokimining ijtimoiy masalalar boʻyicha oʻrinbosari markazdagi tayyor binolardan joy ajratilishini bildirdi.
Universitet “Ekologiya va atrof muhit muhofazasi” yoʻnalishi bitiruvchisi tuman Sanitariya va epidemiologiya boʻlimiga ish so’rab borganida rad etishganini, ish topishda amaliy koʻmak soʻradi. Tuman Tibbiyot birlashmasi boʻlimi boshligʻi aynan ekolog mutaxassislar kerakligini aytib ertasi kuniyoq ishga qabul qilinishini aytdi;
“Maktabgacha ta’lim” yoʻnalishi bitiruvchisi Qodirova Aziza oʻz yoʻnalishida va turar joyiga yaqin joydan ish soʻradi. Tuman maktabgacha va maktab ta’limi boʻlimi boshligʻi tumandagi 12 ta MTT da xoreograf va musiqa ta’limi ustasi vakant ish oʻrinlari borligini aytib xohishiga koʻra shulardan biriga qabul qilinishini aytdi;
“Boshlangʻich ta’lim” yoʻnalishi bitiruvchisi Qoryogʻdiyeva Aziza oʻzi istiqomat qilayotgan “Yangitut” MFYga yaqin joydan ish topib berishlarini soʻradi. Tuman hokimi 46-maktabga ishga joylashtirlishini ma’lum qildi;
“Biologiya” yoʻnalishi bitiruvchisi Nazarova Kamola tumanda mavjud ishlab chiqarish korxonalarida ishlamoqchiligini bildirib vakant oʻrinlar haqida ma’lumot soʻradi. Tuman hokimining ijtimoiy masalalar boʻyicha oʻrinbosari paxta zavodida va Agroklasterda mutaxassislar kerakligini bildirib, xohishiga koʻra ishga olinishini bildirdi;
Universitetning “Geografiya” ta’lim yoʻnalishi bitiruvchisi Ismoilova Sarvinoz oʻz yoʻnalishida ish soʻrab murojaat qildi. Tuman maktabgacha va maktab ta’limi boʻlimi boshligʻi 42-maktabda 0.5 stavka, 32-maktabda 1 stavka oʻqituvchi lavozimi vakant ekanligini bildirib, xohishiga koʻra ishga olinishini bildirdi;
Bundan tashqari, oʻqituvchilar, fakultet dekanlari va kafedra mudirlari tomonidan takliflar bildirilib, bu takliflar tuman hokimi tomonidan ma’qullandi. Xususan, Buxoro davlat universiteti “Xorijiy tillar” fakulteti dekani tomonidan tumanda xorijiy tillarni oʻqitishga moʻljallangan markaz tashkil etilsa, fakultet oʻqituvchilari bilan hamkorlikda faoliyati yoʻlga qoʻyilishini ma’lum qildi. Shuningdek, “Iqtisodiyot va turizm” fakulteti dekani Yavmutov Dilshod tomonidan tumandagilar tayyorlash maktabi va buxgalterlarni qayta tayyorlov maktabini ochishni taklif qildi. Agar ochilsa, fakultet tomonidan faoliyati qoʻllab-quvvatlanishini bildirdi.
