Universitetimizning xalqaro hamkorlik bo‘yicha prorektori A.Jo‘rayev joriy yilning 11-12 may kunlari Qozog‘istonning Narxoz universitetida Mintaqaviy ilm-fan xalqaro assotsiatsiyasi tomonidan tashkil etilgan “Markaziy Osiyoda barqaror mintaqaviy rivojlanish 1-xalqaro konferensiyasi” ishida ishtirok etdi. Prorektor A.Jo‘rayev konferensiyaning yalpi yig‘ilishida “Oliy taʼlimning xalqarolashuvi: tendensiyalar, imkoniyatlar va xavflar” mavzusida maʼruza o‘qish qatorida 2 ta seksiyada moderatorlik ham qildi.
Safarning asosiy maqsadi - Mintaqaviy ilm-fan xalqaro assotsiatsiyasi (Regional Science Association International (RSAI - www.regionalscience.org) faoliyatini kengaytirish bilan bog‘liq masalalarning muhokamasi bo‘ldi. Ushbu xalqaro uyushma 1954 yilda mintaqaviy ilm-fanga oid ilmiy ishlar, g‘oyalar va tashabbuslarni almashish uchun tashkil etilgan platformadir. Bugungi kunda Assotsiatsiyaning Yevropa, Lotin Amerikasi, Tinch okeani va Lotin Amerikasi bo‘linmalari mavjud bo‘lib, unga 4 ming nafardan ortiq olim aʼzo bo‘lib hisoblanadi. Assotsiatsiyaning Scopus bazasida Q-2 ro‘yxatida turuvchi Regional Science Policy and Practice ilmiy jurnali chop etiladi.
Prorektor A.Jo‘rayev Assotsiatsiya vakillari, imiy jurnal redaktori T.Dentinyo hamda Markaziy Osiyoning boshqa mamlakatlaridan tashrif buyurgan olimlar bilan uchrashuvlar o‘tkazdi. Natijada Mintaqaviy ilm-fan assotsiatsiyasining Markaziy Osiyo bo‘limini tashkil etish, Assotsiatsiyaning xalqaro yillik kongressini 2024 yilda O‘zbekistonda o‘tkazish, 2025 yilda Buxoro davlat universitetida yirik xalqaro konferensiya o‘tkazilishi bo‘yicha kelishuvga erishildi. Shuningdek, Regional Science Policy and Practice ilmiy jurnalining maxsus sonini chop etish masalasi muhokama qilindi.
