Berlin erkin universiteti (nemischa: Freie Universität Berlin, qisqartirilgan FU Berlin) poytaxtdagi to'rtta universitetdan biri bo'lib, talabalar soni bo'yicha eng yirik universitetlardan hisoblanadi. Bu oliygoh 1948-yilda tashkil etilgan va Germaniyadagi 10 ta eng yetakchi oliy ta’lim muassasalari ro’yxatiga kiradi.
Joriy yilning 17-dekabr kuni FU Berlinning Sharqiy Yevropa va Markaziy Osiyo bilan hamkorlik qilish departamenti direktori janob Tobias Shtudemann Buxoro davlat universitetiga tashrif buyurdi. Janob T. Shtudemann dastlab Xorijiy tillar fakulteti dekani Nozimjon Ataboyev va Nemis filologiyasi kafedrasi mudiri v.b. Yarash Ro`ziyev bilan uchrashib o`zaro hamkorlik istiqbollarini atroflicha muhokama qildilar. Suhbat yakunida rasmiy mehmon Xorijiy tillar fakulteti talabalari va professor-o`qituvchilariga Germaniya OTMlarida tadqiqot olib borish va o`qish imkoniyatlari haqida ma`ruza qilib berishini ta`kidladi.
19-dekabr kuni Tobias Shtudemanning Buxoro davlat universitetiga tashrifi davom etdi. Kun avvalida uni BuxDU Xalqaro hamkorlik bo`yicha prorektori A.T.Jo`rayev qabul qildi. Qabul davomida A.Jo`rayev FU Berlin universitetining xalqaro QS reytingida 13-o`rin va The World University reytingida 83-o`rinda ekanligiga alohida e`tibor qaratib BuxDU o`zaro samarali hamkorlikdan manfaatdor ekanligini ta`kidladi. O`z navbatida janob T. Shtudemann qabul uchun minnatdorchilik bildirib hamkorlikka talabalar almashuvi, jumladan, 2023-yili BuxDUda xalqaro yozgi maktab tashkil etish bilan start berishni taklif qildi. Qabulda samarali hamkorlik bo`yicha yana qator loyihalarni amalga oshirishga kelishib olindi.
Tashrif davomida Berlin universiteti vakili Xorijiy tillar fakulteti Nemis filologiyasi bo`limi o`qituvchilari va nemis tilini chet tili va ikkinchi til sifatida o`qiydigan talabalar bilan uchrashib „FU Berlinning magistratura bosqichida o’qish imkoniyatlari“ mavzusida ma`ruza qildi. So’ngra u Nemis filologiyasi kafedrasi professor-o`qituvchi va magistrantlari bilan tor doirada suhbat o’tkazdi. Suhbat davomida Berlin universiteti vakili T. A. Shtudemann janoblari yosh tadqiqotchi va magistrantlarga Germaniyada tadqiqot olib borish to’g’risida batafsil ma’lumot berdi.
