Sanoqli kunlardan so`ng quyosh misol qalbimizni, umr yo`limizni yoritadigan, fidoiy va mehribon ustozlar bayramini nishonlaymiz. Bayram shukuhi esa butun O`zbekistonni qamrab oldi.
Buxoro davlat universitetida professor-o'qituvchilar va murabbiylar uchun o`tkazilgan bayram tadbiri ham ushbu kunning quvonchini yanada ziyoda qildi.
– Dunyoda shunday kasb borki, rohatidan mehnati, muvaffaqiyatidan zahmati ko`p. Ustoz va murabbiylik ana shunday qiymatini hech bir boylikka qiyoslab bo`lmaydigan bebaho kasbdir. Jamiyatimiz uchun, universitetimiz uchun eng muhim va qadrli insonlar, aziz ustozlar! Diydor muborak bo`lsin. Ilm yo`lidagi mashaqqatingiz yuksak tahsinga sazovor. Qo`lga kiritiilgan har qanday xayrli natijalar zamirida sizlarning beqiyos hissangiz borligini hamisha e'tirof etsak-da oz. Ulug` dargohga monand shukuhli o`tayotgan ushbu bayram - "O`qituvchi va murabbiylar kuni" barchangizga qutlug` bo`lsin, - deya dil so`zlarini izhor etdi BuxDU rektori iqtisodiyot fanlari doktori, professor Obidjon Xamidov.
Bayram davomida BuxDU Tarix va yuridik fakulteti professori, tarix fanlari doktori Sulaymon Inoyatov, BuxDU Agronomiya va biotexnologiya fakulteti dekani Hafiza Artikovalar ham barcha ustozlarni samimiy tabrikladilar.
“Ustoz” deganda har qaysi inson ko'nglida chuqur hurmat-ehtirom va cheksiz minnatdorlik tuyg'ulari, shu bilan birga, hech qanday boylik bilan o'lchab, ado qilib bo’lmaydigan qarzdorlik hissi paydo bo'ladi. Bugungi tadbirdagi har bir ko`rinish, kuy va qo`shiq ana shu hurmat ifodasi bo`ldi. San’atshunoslik fakulteti murabbiylari, talabalari tomonidan ijro etilgan qo`shiqlar barchaga manzur bo'ldi.
