Bugun o'zbek xalqining sevimli shoirasi, qalb kechinmalarining mohir rassomi, vafo va sadoqat timsoli Zulfiyaxonim tavallud topgan kun. Shoiraning ezgu nomi qadalgan bahorlarga 107-yil to`ldi.
Yurtboshimiz Shavkat Mirziyoyev aytganlaridek, “Oila va jamiyat ustuni, hayotimizning fayzi va ko`rki bo`lgan xotin-qizlarni e’zozlash, ularga hurmat ko`rsatish xalqimiz uchun azal-azaldan buyuk qadriyat bo`lib kelgan”.
Darhaqiqat, ana shu ma’noda, Zulfiyaxonim o`zbek ayollarining munis qiyofasi, mo`tabar ayoli sifatida e’zozga, qadrga sazovordir. Buxoro davlat universitetida “Baxtim shul, o‘zbekning Zulfiyasiman” deya nomlangan adabiy-badiiy, musiqiy tadbir oʻzbek sheʼriyatining otashnafas shoirasi Zulfiya Isroilovaning e’tirofiga bag`ishlandi.
– Bahorning ilk kuni o‘zbegimning ardoqli shoirasi, vafo va sadoqat timsoli Zulfiyaxonim nomi bilan boshlanadi. Nafaqat samimiyatga to‘la betakror she’riyati, balki ibratli hayot yo‘li bilan bugungi yoshlarga namuna bo‘la olgan, surati va siyrati go‘zal Zulfiyaxonim nomini bugun turkiy qavm e’tirof etadi.– dedi BuxDU rektori Obidjon Xamidov Zulfiyaxonim tavalludi bilan barchani tabriklash asnosida. – Har yili Zulfiyaxonim kunlarida turli tadbirlar yuqorida saviyada tashkil etiladi. Endilikda Zulfiyaxonim qizlarining chiroyli bir avlodi shakllangani ham quvonarli hol. Buxoroyi sharifda, bizning muassasamizda ularning borligi, ijod etishayotganini ta’kidlash kishiga iftixor bag`ishlaydi. Yaqin o‘tgan yilda Buxoro davlat universitetining ikki iqtidorli qizi – fan yo‘nalishida g‘oliblikka erishgan Nozima Xoliqova, badiiy ijod yo‘nalishida Dinara Umarovalar Zulfiya nomidagi davlat mukofotiga sazovor ko`rildi. Bu nafaqat Zulfiyaxonim ijodi, balki u mansub ulug‘ xalqqa, o‘zbek ayoliga bo‘lgan e’tirof va ehtirom ramzidir.
Tadbirda so`zga chiqqan Viloyat hokimining xotin-qizlar masalalari bo`yicha maslahatchisi F.B. Ibragimova, Oliy Majlis senati a’zosi, jamiyatning faol ayoli A.A. Huseynova, BuxDU professori, namunali ustoz D.S. O`rayeva, Yoshlar bilan ishlash ma’naviy-ma’rifiy ishlar bo`yicha prorektor A.M. Kadirov, BuxDU xotin-qizlar masalalari bo`yicha maslahat kengashi raisi O.I. Adizovalar jamiyatda va oilada xotin-qizlarning faolligi, ta’lim-tarbiya sifatini oshirishda ayollarning o`rni, xotin-qizlarning fan rivojidagi hissasi kabi bir qator dolzarb masalalarga e’tibor qaratdilar.
Tadbir ko`tarinki ruhda davom etdi. Ayniqsa, Zulfiyaxonim tavalludi munosabati bilan sport sohasida yuksak marralarga erishgan, Davlat stipendiyalariga musharraf bo`lgan bir guruh talaba-yoshlar ustozlari va tengdoshlari oldida tabriklandi.
Shoira ijodiga oid sahna ko`rinishlari, mahorat bilan ijro etilgan kuy-qo'shiqlar va raqslar barchaga a'lo kayfiyat bag'ishladi.
