Til – millat qiyofasining bir bo‘lagi. Xalqning madaniyati, urf-odati, uning turmush tarzi, tarixidir. Til — davlat timsoli, mulki. Tilni asrash, rivojlantirish – millatning yuksalishi demak. Bugun erta tongdan Buxoro davlat universitetida o`zbek tiliga davlat tili maqomi berilgan sana munosabati bilan universitetdagi Navoiy haykali poyiga gul qo‘yish marosimi bo‘lib o‘tdi. Shundan so`ng asrlarda sayqallangan ona tilimiz, g`urur va iftixorimiz e'zozlangan sana munosabati bilan Buxoro davlat universiteti faollar yig`ingohida tadbir bo`lib o`tdi.Marosimda viloyat hokimligi mutasaddilari, shoir va yozuvchilar, adabiyotshunoslar, talabalar, o‘quvchi yoshlar, ijodiy tashkilotlar vakillaridan iborat keng jamoatchilik ishtirok etdi.Tadbirni Buxoro davlat universiteti rektori O. X.Xamidov ochib berdi: “Avvalo, barchangizga “O`zbek tili bayrami” kuni muborak bo‘lsin!Til ajdodlardan avlodlarga qolgan beqiyos milliy boylik, milliy qadriyatdir. Bu tengsiz merosni asrash, uning barhayotligi uchun munosib hissa qo‘shish har bir o`zbekning chin insoniylik burchidir. Mamlakatimiz davlat mustaqilligi sari qo‘yilgan ilk qadam – «Davlat tili haqida»gi qonunning qabul qilinishi va o‘zbek tiliga davlat tili maqomining berilishi edi. Mana, ushbu tarixiy voqeaga 32 yil to‘ldi. Bu shunchaki hodisa emas, chin ma’noda, buyuk kelajakning poydevori edi.Bugungi kunda dunyo bo‘yicha o‘zbek tilida so‘zlashuvchilarning umumiy soni 50 milliondan oshdi. Bu shunchaki gap emas, tilimiz davlat tili maqomiga ega bo‘lgan yuzta tildan biri ekanligi yuragimizga iftixor tuyg‘usini soladi. Milliy tilimiz – bu sobit e’tiqodimiz, tarixiy qiyofamiz, muqaddas qadriyatlarimiz demakdir.”Shundan so‘ng bayram arafasida o‘tkazilgan “Til millat ko`zgusi” rukni ostida berilgan “Eng yaxshi notiq”, “Eng ta’sirchan ijtimoiy rolik”, “Til millat ko`zgusi” mavzusida diktant hamda “O`zbek tilim – mening faxrim” mavzusida insholar tanlovlari g‘oliblari tantanali taqdirlanishdi.Tadbirda so`zga chiqqan O‘zbekiston yozuvchilar uyushmasi Buxoro viloyati hududiy bo‘linmasi rahbari, shoir Shodmon Sulaymonov tilimiz mavqeyi, go`zalligi, bugungi kundagi qiyofasi, keyingi yillarda davlatimiz tomonidan o‘zbek tiliga berilayotgan e’tibor xususida samimiy dil so`zlarini bildirdi. Uni madh etuvchi misralar aytdi.Yig‘ilganlar e’tiboriga o`zbek tili e’tirofiga bag`ishlangan, sahna ko`rinishlari, kuy va qo`shiqlar havola qilindi.BuxDU talabalari, yosh ijrochilarning konsert dasturi barchaga ko‘tarinki kayfiyat baxsh etdi. BuxDU Matbuot xizmati
