Bugun oliy ta’lim tizimiga katta e’tibor qaratilmoqda. Yoshlarni bilim va malakali etib tarbiyalash, jahon taraqqiyotiga mos mutaxassislar tayyorlash maqsadida ta’lim tizimi izchil rivojlantirilmoqda. Ertamiz egalari yosh avlodning hech kimdan kam bo‘lmasdan kamol topishi ularni har tomonlama komil inson bo‘lib ulg‘ayishlari uchun amalga oshirilayotgan islohotlarning eng asosiy sharti ta’lim olish ekanligi bugun barchamizga ayon. Kuni kecha Prezidentimiz Shavkat Mirziyoyev raisligida oliy ta’lim tizimidagi ustuvor vazifalarga bag‘ishlangan videoselektor yig‘ilishida davlatimiz rahbari sohadagi 4 ta ustuvor vazifani sanab o‘tdi. Xususan, oliy ta’lim muassasalari boshqaruv kengashlarining rolini oshirish va kafedralar vakolatlarini kengaytirish, o‘quv jarayonini bozor talablariga moslashtirib, ishlab chiqarish bilan uzviyligini ta’minlash va talabaning o‘z ustida ishlashi uchun muhit yaratish, oliy ta’lim muassasalarining ilmiy salohiyatini oshirish, ilm-fan va innovasiyani rivojlantirish, professor-o‘qituvchilar va talabalar uchun qog‘ozbozlikni kamaytirish, sohani raqamlashtirish orqali byurokratiya va korrupsiyani keskin qisqartirish zarurligini ta’kidladi. Yaratilayotgan islohotlar ilmiy kengashlar faoliyatini yanada jonlantirdi. Buxoro davlat universitetida boshlangan ushbu hafta “Himoyalar haftaligi” deb e’tirof etildi. Joriy yilning 06 iyuldan 19 iyulgacha Buxoro davlat universiteti huzuridagi Ilmiy darajalar beruvchi Ilmiy kengashlarda universitet hamda Respublikamizning turli OTM laridan mustaqil izlanuvchi va tayanch doktorantlar (PhD) ning dissertatsiya himoyalari rejalashtirilgan. Ushbu Ilmiy kengashlarda 15 nafar talabgorlar ilmiy darajalar olish uchun himoyalardan muvaffaqiyatli o‘tishlarini kutib qolamiz.
