Yaqinda Birlashgan Millatlar Tashkilotining Osiyo-Afrika hududi modeli (AAIMUN) doirasida 17-25 yoshlilar o‘rtasida “Dunyo muammolari yoshlar nigohida” mavzusidagi xalqaro onlayn konferensiyasi tashkil etilgan edi. Buxoro davlat universiteti Filologiya fakulteti “Filologiya va tillarni o‘qitish (o‘zbek tili)” yo‘nalishi 2-bosqich talabasi Ahrorova Zufnunabegim Rizvonovna 2021 yilning 15-18 yanvar kunlari mazkur onlayn-konferensiyada ishtirok etdi. Dastlab konferensiya tashkilotchilari tomonidan saralash o‘tkazib, 41460 nafar talabgorning arizasi o‘rganib chiqilib, 65 ta davlatdan 650 ta ishtirok etuvchilar tanlab olindi. Tanlab olinganlar orasida Zufnunabegim ham bor edi. Keyingi bosqichda tashkilotchilar qur’a tashlash yo‘li bilan qatnashuvchilarni guruhlarga bo‘lib chiqishdi. Zufnunabegim Ahrorovaga “Xalqaro valyuta jamg‘armasi” (IMF) guruhida “COVID-19 ta’sirida dunyo tanazzuli (Kanada davlati misolida)” mavzusida ma’ruza qilish vazifasi topshirildi. Ma’ruzalarga qo‘yiladigan talablar juda qat’iy bo‘lib, Kanadaning COVID-19 pandemiyasidan ilgarigi iqtisodiy holati bilan pandemiya davridagi holat solishtirilishi, Kanadaning pandemiya vaziyatida BMTdagi ishtiroki yoritilishi, takliflar berilishi va muammolarga yechimlar ko‘rsatilishi lozim edi.Konferensiya doirasidagi barcha muloqotlar turli millat vakillari tomonidan ingliz tilida olib borildi. E’tiborlisi, Filologiya fakulteti 2-bosqich talabasi Zufnunabegim Ahrorova o‘z ma’ruzasi va bahs-munozaralardagi faol ishtiroki uchun Birlashgan Millatlar Tashkilotining Osiyo-Afrika hududi modeli (AAIMUN) bosh kotibi Andeta Karamina tomonidan 2 ta sertifikat bilan taqdirlandi.BuxDU Matbuot xizmati
