11.01.2022

Mamlakatimiz oliy taʼlim sohasida xalqaro hamkorlik tobora kengayib, turli shakldagi o‘zaro manfaatli aloqalarda namoyon bo‘lmoqda. Shunday hamkorlikning bir ko‘rinishi xorijiy oliy taʼlim muassasalari bilan hamkorlikda tashkil qilinayotgan qo‘sh diplomli bakalavriat va magistratura dasturlaridir.Buxoro davlat universitetida jahon akademik reytinglarida yuqori o‘rinlarda turuvchi bir necha xorijiy hamkorlar bilan 8 ta qo‘shma taʼlim dasturi muvaffaqiyatli faoliyat ko‘rsatib kelmoqda. Hamkorlar orasida Fransiyaning Vatel mehmonxona va turizm biznes maktabi, Rossiya Federatsiyasining Moskva davlat universiteti, Qozon federal universiteti, Bolgariyaning Sofiya universiteti, Isroilning Xolon texnologiyalar instituti kabi nufuzli oliy taʼlim muassasalari borligi oliy taʼlim sohasidagi islohotlar tizimning xalqaro miqyosda ham jozibadorligi oshayotganidan dalolatdir. Eng asosiysi, universitetda ijtimoiy-iqtisodiy sohada mavjud real ehtiyojdan kelib chiqqan holda qo‘shma taʼlim dasturlari tashkil etilayotganligi muhim ahamiyat kasb etadi.2019-2020 o‘quv yilidan boshlab, Buxoro davlat universiteti va Indoneziyaning Gunadarma universiteti hamkorligida mamlakatimizda ilk marotaba trimestr (3 semestr) davom etuvchi “Raqamli turizm” magistratura dasturi yo‘lga qo‘yilgan hamda unga 7 nafar o‘zbekistonlik va 11 nafar indoneziyalik talabalar qabul qilinishgan edi. Magistrantlar dasturning bir qismini O‘zbekistonda o‘qishgan bo‘lsa, bir qismini Indoneziyada o‘qib, ilmiy amaliyotda ham bo‘lib qaytishdi. Magistrlik dissertatsiyalari har ikkala tomondan belgilangan rahbarlar maslahati asosida tayyorlandi va muvaffaqiyatli himoya qilindi.Bugun ushbu dasturning ilk bitiruvchilarini tabriklashga bag‘ishlangan tantanali tadbir o‘tkazildi. Tadbirda ikki universitet rahbariyati, talabalarning ota-onalari, mahalliy boshqaruv organlari, Oliy va o‘rta maxsus taʼlim vazirligi, Turizm va sport vazirligi, mamlakatimizning Indoneziyadagi elchixonasi xodimlari ishtirok etishdi. Videokonferensiya ko‘rinishida o‘tkazilgan tadbirda bitiruvchilarni Gunadarma universiteti rektori, O‘zbekistonning Indoneziyadagi turizm elchisi, professor Eko Sri Margiante xonim hamda Buxoro davlat universiteti rektori, professor Obidjon Xamidov tabrikladilar. Rektor hamda prorektorlar o‘zbekistonlik va indoneziyalik bitiruvchilarga ikkala universitet diplomlarini tantanali ravishda topshirishdi.“Raqamli turizm” qo‘shma magistratura dasturiga 2020-2021 o‘quv yili uchun ham talabalar qabuli amalga oshirilgan bo‘lib, bugungi kunda talabalar o‘z sohalari bo‘yicha eng zamonaviy bilimlarni olishmoqda.BuxDU Xalqaro hamkorlik bo'limi