11.01.2022

Universitetimizda Chexiyaning Liberets texnika universiteti bilan hamkorlik munosabatlari o‘rnatilgan bo‘lib, o‘zaro professor-o‘qituvchi almashinish dasturlarini amalga oshirish maqsadida Erasmus+ kredit mobilligi kelishuviga erishilgan edi. Ushbu kelishuvni amalga oshirish masalalarini muhokama qilish maqsadida 26-fevral kuni xalqaro hamkorlik bo‘yicha prorektor A.Jo‘rayev Liberets texnika universiteti Iqtisodiyot fakulteti rahbariyati bilan onlayn uchrashuv o‘tkazdi.Yevropa Komissiyasining Erasmus+ dasturi tomonidan moliyalashtiriladigan kredit mobilligi kelishuvi bo‘yicha LTUdan BuxDUga 1 nafar, BuxDUdan LTUga 2 nafar professor-o‘qituvchining tashrifi rejalashtirilgan. Bugungi kunda Chexiyada koronavirus pandemiyasi bilan bog‘liq holat yana og‘irlashayotgani hamda universitetlarning anʼanaviy taʼlim shakliga qaytishlari kuz oylariga qadar rejalashtirilmaganligi sababli almashinuv dasturi doirasidagi mobilliklar kuz oylariga qadar kechiktirilgan.Uchrashuvda Erasmus+ almashinuvi qatorida boshqa masalalar ham muhokama qilindi. Shu jumladan:1) Prorektor A.Jo‘rayev tomonidan o‘zaro hamkorlikni huquqiy meʼyorlarga muvofiqlashtirish maqsadida universitetlararo hamkorlik memorandumini imzolash taklif etildi. LTU tomoni taklifni qabul qilib, ushbu masalada rahbariyat bilan kelishgan holda memorandumni imzolash uchun maʼqul bir sana belgilanishini maʼlum qildi.2) O‘zaro o‘qituvchi almashinuvini onlayn ravishda ham yo‘lga qo‘yish taklifi bildirildi. Ikki tomon o‘z o‘quv rejalarida mavjud bo‘lgan hamda ingliz tilida o‘qitiladigan fanlar ro‘yxatini almashish va ehtiyoj mavjud bo‘lgan hollarda, tegishli kurslarni o‘qitish uchun masʼul o‘qituvchilarni belgilab olishga kelishib olishdi.3) Prorektor A.Jo‘rayev tomonidan Liberets texnika universiteti bilan qo‘shma rahbarlik shaklida PhD dissertatsiyalarini tayyorlash bo‘yicha taklif kiritildi. LTU tomoni bu masala o‘rganib chiqilishi hamda kengaytirilgan uchrashuvda kun tartibiga kiritilishini maʼlum qildi. Maʼlumot uchun: Liberets texnika universiteti 1953 yilda tashkil qilingan bo‘lib, bugungi kunda 7 ta fakultet va 1 ta institutdan iborat. Talabalar soni 7 mingdan ortiq bo‘lib, ularning 625 nafari xorijliklardir. Xorijlik professor-o‘qituvchilar soni 50 nafardan ortiq. Universitet QS-2021 akademik reytingida jahonning yetakchi OTMlari orasida 751-800-o‘rinni, Chexiya bo‘yicha esa 8-o‘rinni egallab turibdi. Universitetda umumiy hajmi 3 mln. AQSH dollariga yaqin bo‘lgan 100 dan ortiq xo‘jalik shartnomalari amalga oshirilmoqda.Universitet vebsayti: https://www.tul.cz/en/BuxDU Matbuot xizmati