Mamlakatimizda Prezidentimiz Islom Karimov tashabbusi va rahnamoligida har bir yilga alohida nom berilib va shu asosda ishlab chiqilayotgan davlat dasturlari yurtimizning yanada taraqqiy etishi, xalqimiz turmushining tobora farovon bo’lishiga xizmatqilmoqda. O’zbekiston Respublikasi Konstitutsiyasi qabul qilinganining 22 yilligiga bag’ishlangan tantanali marosimda Yurtboshimiz 2015 yilni Keksalarni e’zozlash yili deb e’lon qildi hamda:«Xalqimizning qadimiy va shonli tarixini uzviy davom ettirishga, shu tarixning o’chmas sahifalarini, ajdodlarimizning buyuk merosini, qadriyat va urf-odatlarini yoshlarimizga yetkazish, hayotimizni tobora poklash va fayzu barakali qilishda, bir so’z bilan aytganda, uni ma’naviy yuksaltirishda, bugun Yaratganning bizga bergan har bir kunini ma’noli va sermazmun o’tkazishda beqiyos hissa qo’shayotgan ota-bobolarimizga har tomonlama hurmat, e’zoz va ehtirom ko’rsatish barchamiz uchun ham qarz, ham farz, deb o’ylayman», deya ta’kidladi.Darhaqiqat, ushbu ustuvor vazifalar davlatimiz rahbarining joriy yilning 18 fevralida qabul qilingan «Keksalarni e’zozlash yili» Davlat dasturi to’g’risida»gi qarori bilan tasdiqlangan Davlat dasturida yaqqol o’z ifodasini topgan.Ushbu muhim huquqiy hujjat avvalgi yillardagi Davlat dasturlarining mantiqiy davomi sifatida xonadonlarimiz fayzi va farishtasi — nuroniylarni e’zozlash, ularning qimmatli pandu nasihatlari, ibratli hayot yo’llarini yoshlar ongiga singdirishda muhim dasturilamaldir.Davlat dasturining 4 ta bandida «Mahalla» xayriya jamoat fondi asosiy ijrochi, 22 tasida esa hamijrochilar qatorida belgilangani ushbu tuzilmaga davlatimiz tomonidan bildirilayotgan ishonchning amaldagi ifodasidir.Inson manfaatlari, Oila, Sog’lom avlod, Qariyalarni qadrlash, Obod mahalla, Mehr-muruvvat, Sihat-salomatlik, Ijtimoiy himoya va boshqa nomlar bilan atalgan yillarda amalga oshirilgan ishlar xalqimizning ezgu a’moliga aylangan keksalarni e’zozlashdek oliyjanob maqsadlar bilan hamohangdir.Ta’kidlash joizki, mustaqillikning ilk kunlaridan qariyalarni qadrlash, ularning sog’lig’iga alohida e’tibor qaratish, yakka-yolg’iz keksalarni ijtimoiy qo’llab-quvvatlash davlatimiz siyosatining ustuvor yo’nalishlaridan biriga aylandi. Birgina o’tgan yilning o’zida piru badavlatlarimizga davlat byudjeti hisobidan 11 trillion 618 milliard so’mdan ziyod pensiya, 105 milliard so’mdan ziyod nafaqalar berildi. Davlatimiz pensiya-ga ajratadigan mablag’ning miqdori o’rtacha oylikning 41 foizdan ziyodini tashkil etadi. Bu ko’rsatkich dunyodagi kamdan-kam davlatlarda uchraydi.Nuroniylarni e’zozlash, ularning salomatligini tiklash haqida so’z ketganda Yurtboshimizning 2014 yil 13 oktyabrdagi «1941-1945 yillardagi urush va mehnat fronti faxriylarini ijtimoiy qo’llab-quvvatlashni yanada kuchaytirish chora-tadbirlari to’g’risida»gi farmoniga to’xtalib o’tish joiz. Ushbu hujjatga asosan joriy yildan boshlab urush va mehnat fronti faxriylari yilda bir marta o’zlari uchun maqbul muddatlarda yurtimizning nufuzli sanatoriy-sog’lomlashtirish markazlarida bepul davolanish imkoniyatiga ega bo’ldilar.Ayni kunlarda Fondimiz «Nuroniy» jamg’armasi hamda tegishli tashkilotlar bilan hamkorlikda mahallalarda urush va mehnat faxriylariga sanatoriy-sog’lomlashtirish muassasalariga yo’llanmalar berishni boshlab yubordilar.Keksa avlod vakillariga g’amxo’rlik ko’rsatish, ularning ro’zg’or yumushlariga ko’maklashishda «Mahalla» xayriya jamoat fondi, hududiy bo’lim va bo’linmalar hamda fuqarolar yig’inlarining ham alohida o’rni bor. Ikkinchi jahon urushi qatnashchilari hamda mehnat fronti faxriylarini ijtimoiy qo’llab-quvvatlash masalasi Sog’lom bola yilida ham Fond faoliyatining muhim yo’nalishlaridan biri bo’ldi. Bugungi saodatli kunlarga yetib kelishimizda fidoyilik ko’rsatgan nuroniylarga 1 milliard 888 million so’mlik turli xayriya yordamlari ko’rsatildi.«Keksalarni e’zozlash yili» Davlat dasturida belgilangan ustuvor vazifalarni amalga oshirishda nuroniylarni e’zozlash, ularga g’amxo’rlik qilish sifat jihatidan yangi bosqichga ko’tarilishi shubhasiz. Zotan, dasturning 2-bandida «Keksalar, nogironlar va aholining boshqa toifalari uchun ijtimoiy xizmatlar to’g’risida»gi qonun loyihasini tayyorlash belgilangan. Demak, keksa avlod vakillariga har tomonlama sifatli xizmat ko’rsatishning mustahkam huquqiy asosi yaratiladi.Keksalarga ko’rsatiladigan mehr-muruvvat, albatta, fuqarolar yig’inlari orqali amalga oshiriladi. Shu bois joriy yilda mahallalarning namunaviy tuzilmasida keksalar va nogironlarga alohida e’tibor qaratish hamda tegishli idoralar, birinchi navbatda, pensiya, ijtimoiy, tibbiy ta’minot idoralari faoliyati ustidan jamoatchilik nazoratini o’rnatish maqsadida komissiyalar tashkil etiladi. Komissiya yig’ilishlarida pensiya, ijtimoiy va tibbiy ta’minot idoralari rahbarlarining hisobotlarini eshitish yo’lga qo’yiladi.Shuningdek, byudjet mablag’lari hisobidan ijtimoiy nafaqa, moddiy yordamlarni mahallalarda istiqomat qiluvchi yakka-yolg’iz, ijtimoiy himoyaga muhtoj keksalar, nogironlarga maqsadli hamda manzilli tayinlash bo’yicha fuqarolarning o’zini o’zi boshqarish organlari xodimlarining bilim va malakalarini yanada oshirish ko’zda tutilgan.Davlat dasturiga muvofiq, yil davomida mahallalarda «Keksalar duosini olaylik» aktsiyasi doirasida 10 ming nafar yakka-yolg’iz va ijtimoiy yordamga muhtoj keksalarga maishiy texnika vositalari, shuningdek, kiyim-boshlar ulashiladi. Har bir tuman, shahardan ijtimoiy himoyaga muhtoj 500 nafar qariya, pensioner va nogiron uy-ro’zg’or buyumlari bilan ta’minlanadi. SHuningdek, un, shakar, o’simlik yog’i va ro’zg’or uchun boshqa zarur mahsulotlar qariyalarga bepul tarqatiladi. Har bir mahalla guzariga badiiy adabiyotlar, shaxmat va shashka jamlanmalari yetkazib beriladi.«Hech kim mehr va e’tibordan chetda qolmasin!» shiori ostida respublikamizning har bir hududidan 1000 nafar nuroniyni yurtimizning tarixiy shaharlari, ziyoratgohlar va muqaddas qadamjolarga sayohatini uyushtirishdek xayrli ishlar bu yil ham davom ettiriladi.Davlat dasturi doirasida keksa avlod vakillariga e’tiborni yanada kuchaytirish maqsadida mahallalarda «Eng yaxshi mahalla guzari» va «Keksalar — oila tayanchi» mavzularida ko’rik-tanlovlar o’tkaziladi. Ellik yildan beri ahil-inoq yashab, el koriga kamarbasta farzandlarni voyaga yetkazgan oila boshliqlarining ibratli hayot yo’llarini yoshlarga namuna qilib ko’rsatish maqsadida otaxonu onaxonlar ishtirokida «Mehr-muhabbat va totuvlikda kechayotgan umr», «Qo’sha qarib qadr topganlar», «Qarisi bor uyning parisi bor» mavzularida uch avlod uchrashuvlari, ma’naviy-ma’rifiy tadbirlar tashkil etiladi.Bundan tashqari, Saxovat va Muruvvat uylarida yashovchi 7 ming nafarga yaqin keksa va nogironlarni ma’naviy va moddiy qo’llab-quvvatlash maqsadida har biriga mavsumiy kiyim-kechak, ko’rpa-to’shak jildlari jamlanmasi hamda shaxsiy gigiena vositalari bilan ta’minlash choralari ko’riladi. SHuningdek, ularning mazmunli dam olishlarini tashkil qilish maqsadida madaniy-ko’ngilochar kechalar uyushtiriladi.An’anaga muvofiq yurtimizdagi muqaddas qadamjolar, ko’chayu xiyobonlar, qabristonlarni obodonlashtirish ishlari joriy yilda ham keng quloch yozadi. Negaki, hashar mehr-oqibat, odamiylikdan saboq beruvchi bebaho tarbiyaviy ahamiyatga ega tadbirdir. Unda ishtirok etgan otaxonlarning nasihatlari tufayli yoshlar qalbida mahalla-ko’yga, ona-Vatanga muhabbat tuyg’ulari mustahkamlanadi.Ayni paytda yurtimizda 225 ming nafar 80 yoshdan, 44 ming nafar 90 yoshdan, 8 ming 700 nafar 100 yoshdan oshgan tabarruk qariya yashamoqda. Ular orasida 3 ming 109 nafar Ikkinchi jahon urushi qatnashchisi, 69 ming 994 nafar front ortida mehnat qilgan insonlar bor. Bu raqamlar Fond hamda fuqarolar yig’inlari zimmasiga alohida mas’uliyat yuklaydi.Muxtasar aytganda, Davlat dasturida belgilangan ustuvor vazifalar, mazmun-mohiyatiga ko’ra, insonparvarlik tamoyillariga yo’g’rilganki, bu, shubhasiz, keksalarni e’zozlash, yoshlarni har tomonlama barkamol etib tarbiyalashda nuroniylarning yo’l-yo’riq va tavsiyalariga tayanib ish tutishga, eng muhimi, har birimizni bugungi dorilamon kunlarning qadriga yetishga undaydi.
