11.01.2022

Joriy yilning 19 dekabr kuni Buxoro davlat universiteti “Matematik analiz” kafedrasi tashabbusi bilan “Oliy ta’limda xorij tajribasi” mavzusida xalqaro online vebinar bo’lib o’tdi. Uning ochilish marosimida Fizika-matematika fakulteti dekani H.O.Jo’rayev so’zga chiqib vebinar ishtirokchilarini qutladi. “Matematik analiz” kafedrasi dotsenti T.H.Rasulov esa vebinardan ko’zlangan asosiy maqsad bilan tanishtirdi. So’ngra “Matematik analiz” kafedrasi tayanch doktoranti Rashidov Anvarjon Sharipovich tomonidan “Matematika fanlaridan o’quv mashg’ulotlarining samaradorligini oshirishda ilg’or xorijiy tajribalardan foydalanish metodikasi” mavzusida tayyorlangan loyiha taqdimot qilindi.Vebinar ishida xorijning yetakchi ta’lim muassasalarida faoliyat olib borayotgan M.Mo’minov (Malayziya texnologiya universiteti), K.Raximov (CNRS ilmiy markazi, Lill universiteti, Fransiya), Marks Ro’ziboyev (Leyden universiteti, Gollandiya), A.Pirnapasov (Ruhr-Bohum universiteti, Germaniya), H.Egamberganov (Edingburg universiteti, Buyuk Britaniya), O.Ibrogimov (Shveysariya federal texnologiya instituti), I.Akramov (Ulm universiteti, Germaniya) va Z.Ibragimov (Bern universiteti, Shveysariya) kabi o’zbek olimlari ishtirok etdilar. Bundan tashqari, O’zbekiston Milliy Universiteti, Samarqand davlat universiteti, Qoraqalpoq davlat universiteti, V.I.Romanovskiy nomidagi Matematika instituti va uning hududiy bo’linmalari xodimlar faol qatnashdilar.Taqdimot qizg’in munozaralarga boy tarzda o’tdi. Vebinarda ishtirok etgan xorijiy ta’lim muassasalari vakillari respublikamizda Matematika ta’limi va ilm-fanini rivojlantirish bo’yicha olib borilayotgan islohotlarga befarq emasliklarini yana bir bor namoyish etdilar.Vebinar yakunida A.Sh.Rashidov tomonidan ishlab chiqilgan loyiha, dasturiy vosita va xorij tajribasi asosida tashkil etilgan o’quv mashg’uloti videoroligi yuqori saviyada mukammal tayyorlanganligi e’tirof etildi. Loyiha doirasida nashr qilingan 1 ta o’quv qo’llanma, 2 ta o’quv-metodik qo’llanmalar, O’zbekiston Respublikasi Oliy Attestatsiyasi Komissiyasi tomonidan dissertasiya asosiy ilmiy natijalarini chop etish tavsiya etilgan xalqaro jurnallarda 4 ta va mahalliy jurnallarda 4 ta ilmiy maqolalar, 8 ta xorijiy va Respublika miqyosida o’tkazilgan konferensiyalarda tezislar nashr qilinganligi, O‘zbekikiston Respublikasi Adliya vazirligi huzuridagi intelektual mulk agentligi tomonidan berilgan guvohnoma olinganligi aytib o’tildi hamda tahlil qilindi.Muallif: Tulkin Rasulov