11.01.2022

16-dekabr kuni O‘zbekiston Respublikasining Yekaterinburg shahridagi bosh konsulligi tashkilotchiligi asosida Buxoro davlat universiteti bilan Tyumen davlat universiteti rahbariyati o‘rtasida onlayn uchrashuv bo‘lib o‘tdi. Uchrashuvda O‘zbekistonning Yekaterinburgdagi bosh konsuli A.Xatamov, BuxDUdan rektor O.Xamidov, xalqaro hamkorlik bo‘yicha prorektor A.Jo‘rayev, xalqaro hamkorlik bo‘limi boshlig‘i M.Qilichov, Iqtisodiyot va turizm fakulteti dekani J.Jo‘rayev, Iqtisodiyot va turizm fakulteti dekani D.Yavmutov ishtirok etishdi. TyumDUdan esa rektor v.v.b. A.Tolstikov, prorektorlar E.Sechenova, A.Patrushev, xalqaro aloqalar boshqarmasi boshlig‘i A.Seryakovlar qatnashishdi.Rektor O.Xamidov va rektor v.v.b. A.Tolstikov universitetlar to‘g‘risida umumiy maʼlumotlarni berib o‘tishganidan so‘ng, o‘zaro hamkorlikning ustivor yo‘nalishlari muhokama qilindi.1) Eng qisqa muddatda o‘zaro hamkorlik memorandumi imzolanadi. Memorandum imzolash jarayoni Tyumen davlat universitetida O‘zbekiston burchagining ochilishi tadbiriga ham ulanib ketadi. Joriy yilning 12 oktyabr kuni bosh konsul A.Xatamov TyumDU turkologiya markaziga 2020 yilda nashrdan chiqqan 5 tomli “O‘zbek tilining izohli lug‘ati”ni sovg‘a qilganida, universitetda o‘zbek tili va adabiyoti bo‘yicha tadqiqotlarni rivojlantirish maqsadida “O‘zbekiston burchagi”ni tashkil qilish g‘oyasi tug‘ilgan edi. Respublikamizning Yekaterinburgdagi bosh konsulligining ushbu tashabbusi hududdagi o‘zbek diasporasi uchun ham, ilmiy tadqiqotchilar uchun ham sovg‘a bo‘ladi.2) Hamkorlik memorandumi doirasida o‘zaro o‘qituvchi va talaba almashinuvi yo‘lga qo‘yiladi, hamkorlikda ilmiy konferensiyalar, onlayn maʼruzalar tashkil etiladi. Xususan, BuxDU tomonidan “Sibirdagi buxoroliklarning hudud ijtimoiy-iqtisodiy va madaniy hayotiga qo‘shga hissasi” mavzusida konferensiya tashkil qilish taklifi bildirildi. TyumDU rektori v.v.b. A.Tolstikov Tyumen hududini bugungi O‘zbekiston, xususan Buxoro bilan bir necha yuz yillik savdo, madaniy va taʼlim aloqalari bog‘lab turishini taʼkidladi. O‘z vaqtida kelib chiqishi buxorolik bo‘lganlar yashab o‘tgan joylar hozirgi kunda “Buxoro mahallasi” (“Buxarskaya sloboda”) deb nomlanishi, TyumDUda bu sohada bir qator ilmiy izlanishlar olib borilganligi maʼlum qilindi. 2021 yilning boshida tashkil etiladigan konferensiyada mana shu izlanishlarning natijalari bo‘yicha maʼruzalar qilinadi.3) Tyumen davlat universiteti biznes-akseleratorida bir qator innovatsion g‘oyalar, masalan “jonli afishalar”, “TyumenWay – Tyumenning raqamli xaritasi” kabi bir qator ishlanmalar tayyorlangan bo‘lib, ularni BuxDU dasturchilari va iqtidorli talabalarida qiziqish uyg‘otishi mumkin. Xuddi shuningdek, BuxDUdagi ishlanmalarni ham tyumenlik qiziquvchilarga namoyish qilish mumkin. Tomonlar ushbu yo‘nalishda ham onlayn vebinar tashkil qilishga kelishib olishdi.4) Tomonlar turizm sohasida ham, xususan tibbiy va reabilitatsion turizm bo‘yicha hamkorlik qilish mumkinligini qayd etdilar. Tyumen hududida ham Buxoroning Mohi Xosa va boshqa manzillaridagi kabi termal shifobaxsh suvli joylar mavjud bo‘lib, ulardan tibbiy turizmni rivojlantirishda foydalanish mumkin. Tyumen davlat universiteti haqida maʼlumot:Tyumen davlat universiteti ham BuxDU kabi 1930 yilda tashkil qilingan bo‘lib, joriy yilda 90-yilligini nishonlamoqda. Ayni paytda universitet tarkibida 15 ta institut va 2 ta filial mavjud. Talabalar soni 27 mingdan, xorijlik talabalar soni 1900 dan ortiq. Universiteti Rossiya Federatsiyasining “5-100” dasturi aʼzolaridan hisoblanadi. Ushbu dastur Rossiya OTMlarining jahon taʼlim muhitidagi raqobatdardoshligini oshirish hamda yaqin yillarda 5 ta OTMning jahon reytinglarida yuqori 100 talikka kirishiga qaratilgan. BuxDU Matbuot xizmati