2020-yilning 7-noyabr kuni Buxoro davlat universitetida Qo'shma ta'lim dasturlari fakulteti 1-kurslari uchun "Welcome day" marosimi bo'lib o'tdi. Ushbu marosimda BuxDU rektori Obidjon Xamidov, Buxoro viloyati madaniy meros boshqarmasi xodimi Sh.Sharofiddinov, Bukhara Grand mehmonxonasi menedjeri Sh.Zokirov, BuxDU O'quv ishlari bo'yicha prorektori M.Daminov, BuxDU Xalqaro hamkorlik bo'yicha prorektori A.Jo'rayev, Qo'shma ta'lim dasturlari fakulteti dekani O.Rahimov, barcha fakultet dekanlari hamda 1-2 kurs Vatel, Qozon federal universiteti, Gunadarma universiteti, Xolon texnologiya instituti qo'shma ta'lim yo'nalishlari talabalari ishtirok etishdi. Uchrashuvda BuxDU rektori nomidan o'quv ishlari bo'yicha prorektori M.I.Daminov talabalarni ushbu kun bilan tabrikladi. Shuningdek, tadbirda BuxDU Xalqaro hamkorlik bo'yicha prorektori A.Jo'rayev so'zga chiqib talabalarga universitet tarixi, ilmiy salohiyati, universitetda yetishib chiqib xorijda faoliyat olib borayotgan bitiriuvchilar, kelgusidagi talabalar uchun yaratiladigan shart-sharoitlar haqida gapirib o'tdi. BuxDU rahbariyati a'lo baholarga o'qigan, tartib-intizomi bilan o'rnak bo'lgan 2-kurs talabalarini diplom bilan taqdirladilar. Talabalarga hamkor xorijiy oliy ta'lim muassasalar rektorlari tomonidan aytilgan videotabriklar ko'rsatildi. Tadbirda Iqtidorli II-kurs talabalari I-kurs talabalariga tabrik so'zi yo'lladilar. Shu aytish joizki, VATEL biznes-maktabi 2016 yilda mehmondo‘stlik sohasida jahonning eng yaxshi biznes-maktabi deb tan olingan. Nufuzli QS akademik reytingining 2021 yil uchun ko‘rsatkichlarida biznes-maktab turizm va mehmonxona boshqaruvchi yo‘nalishida 18-o‘rinni egallab turibdi. Shuningdek, 55 ta kampus, 35 ming nafardan ortiq bitiruvchi, 9 ming nafardan ortiq joriy talabalar soni bilan VATEL jahondagi ilk turizm va mehmonxona boshqaruvi biznes-maktabi guruhi maqomiga ega. O‘zaro hamkorlik doirasida Buxoro davlat universitetida 2019 yilda “Xalqaro mehmonxona menejmenti” bakalavriat ta’lim yo‘nalishida ta’lim yo‘lga qo‘yildi. Biznes-maktabning Markaziy Osiyo (Qozog‘istondan tashqari) va Afg‘oniston uchun amal qiluvchi franshizasi Buxoro davlat universitetiga tegishlidir.BuxDU Matbuot xizmati
