Ko‘hna va navqiron Buxoroi sharifning ma’naviy-ma’rifiy, ijtimoiy, madaniy hayotining to‘laqonli bo‘lishiga o‘zining munosib hissasini qo‘shib kelayotgan Buxoro davlat universiteti 90 yoshni ulkan yutuqlar, zalvorli muvaffaqiyatlar bilan qarshilamoqda.Oliygohimizning tamal toshini qo‘ygan, uning nomini jahonga tanitgan, tanitayotgan zukko olimlar, professor-o‘qituvchilar, respublika miqyosida ta’lim dargohlarining ziyokoriga aylangan ustoz muallimlar mehnatini e’tirof etish, ularning ilmiy maktablarini, ilmga, ta’lim-tarbiyaga baxshida umr yo‘llarini o‘rganmoq biz uchun ham sharaf, ham mas’uliyatdir.Hayot yo‘llari ilm mashaqqati bilan yo‘g‘rilgan, o‘z baxtlarini shogirdlar kamolida ko‘ra olgan ko‘plab ulug‘larning qadamlari ushbu dargoh bilan bog‘liq. Sermahsul ustozlarning ilmiy va ma’naviy kamolot yo‘li hamisha yosh avlod uchun namuna maktabi, ibrat darsxonasidir. Bugun o‘z taraqqiyot yo‘li, oliygohlar ichida mustahkam o‘rni, salohiyati, ta’lim-tarbiya sohasida ulkan tajribasi bo‘lgan ilm dargohimiz – Buxoro davlat universiteti munosib 90 yillik yubileyini nishonlamoqda. Oliygohimizning betakror shodiyonasi barchamizga muborak bo‘lsin! Ushbu tantanali marosimni oliygoh rivoji uchun o‘z xizmatlarini ayamayotgan, xayrli ishlarga rahnamolik qilayotgan Buxoro viloyati deputati, Buxoro davlat universiteti rektori, iqtisodiyot fanlari doktori, professor XAMIDOV OBIDJON XAFIZOVICh ochib berdilar. Tadbirni BuxDU ilmiy ishlar va innovatsiyalar bo‘yicha prorektori O.S.Qahhorov boshqardi. Tadbirda BuxDU sobiq bitiruvchisi, O‘zbekiston Respublikasi Madaniyat vazirining birinchi o‘rinbosari NOSIROV JAMOL ShUXRATOVICh, Buxoro viloyatimiz xotin-qizlar faoliyatini samarali yo‘lga qo‘ygan, hukumat tomonidan soha rivoji yo‘lida qabul qilingan qarorlarning bajarilishiga rahbarlik qilgan, Buxoro viloyati hokimi o‘rinbosari BuxDU sobiq bitiruvchisi, Feruza Bahodirovna Ibragimovaga, O‘zbekiston Respublikasi Oliy Majlisi Senati a’zosi, Respublika «Oila» ilmiy-amaliy tadqiqot markazining Buxoro viloyati boshqarmasi boshlig‘i Abera Amanovna Huseynovalar tarixiy kun bilan tabriklashdi.Shuningdek, bugungi tadbirda ishtirok etgan, universitet tarixi va buguni haqida iliq fikrlarni bildirish uchun so‘z Buxoro viloyatining rivojida munosib xizmatlari bo‘lgan, kunu tun xalq manfaatini, tinchligini, osoyishtaligini ta’minlayotgan, xalqimiz turmush tarzini yaxshilashga bel bog‘lagan, ko‘plab ilm ahlining kelajak yo‘lini belgilab olishiga yaqin ko‘makchi bo‘lgan, ayniqsa, yoshlarning iqtidorini yuzaga chiqarishda, muammo va tashvishlarini bartaraf etishda, ularning iste’dod va iqtidori, faoliyatini yoritish, targ‘ib etishda o‘zining beminnat xizmatlarini ko‘rsatayotgan Buxoro viloyati hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari Hamroev Mirali Muhammadjonovichga berildi.Bugungi kunda universitetda qirqqa yaqin fan doktori, professorlar, 170 dan ziyod fan nomzodi, falsafa doktori va dotsentlar faoliyat ko‘rsatmoqda, 100 dan ortiq yosh olimlar va mingdan ziyod iqtidorli talabalar faoliyat olib bormoqdalar. Ta’kidlash o‘rinliki, oliygoh ta’lim tizimi yildan yilga takomillashib, ko‘lam jihatdan ham kengayib bormoqda. 12 ta fakulьtet o‘z faoliyati bilan universitet nufuzini yuksalishi uchun beminnat xizmatlarini o‘tab kelmoqdalar bunga misol qilib “Yuksak taraqqiyot kuchli bilim ilm fan va tafakkurdadir” shiori ostida universitet faoliyati jarayonidan lavhalar aks etgan videorolik qo‘yildi.Universitet rivojiga ulkan hissa qo‘shgan fahriy professorlar KOMIL MUQIMOVICh MUQIMOV, Qahhorov Siddiq Qahhorovich, Sulaymon Inoyatovich Inoyatov, Sharif Olimovich Boltaev, Choriev Tavakkal Ravshanovichlar ham universitetning 90 yilligi bilan qutlashdi.Tadbir davomida yoshlarni jismoniy chiniqtirish, ularning sport sohasida qobiliyatini namoyon qilishlari uchun zarur sharoitlar yaratishga, respublika va xalqaro musobaqalarda nufuzli o‘rinlarni qo‘lga kiritishga muvaffaq bo‘lib kelayotgan, jismoniy madaniyat fakulьteti dekani, p.f.d., dots. Ma’murov Baxodir Baxshilloevich, ilmiy izlanishlari, tashkiliy faoliyati va qator boshqa yutuqlari bilan universitetimizda o‘rnak bo‘lgan Tabiiy fanlar fakulьteti dekani, q.x.f.d., dots. Artikova Xafiza To‘ymurodovna, o‘zbek tili va adabiyoti rivojini yanada yuksaltirish ma’naviyatimiz durdonalarini xorijiy mamlakatlarga keng tanishtirishda, talabalarning rus tilidagi savodxonligini oshirayotgan filologiya fakulьtetining dekani, f.f.d., dots. Rajabov Dilshod Zaripovich, Ta’lim muassasasida chet tillarni o‘qitishning sifatini yanada takomillashtirish chora-tadbirlari, mazkur faoliyatga tegishli qator me’yoriy-huquqiy hujjatlarda belgilangan vazifalarni amalga oshirishda va xalqaro oliy ta’lim muassasalari bilan ilmiy – amaliy konferentsiyalarni sifatli tashkil qilishda faol ishtirok etib kelayotgan Xorijiy fanlar fakulьteti dekani f.f.d., dots. Jo‘raeva Malohat Muhammedovna, Ta’lim berish jarayonida pedagogik faoliyatini takomillashtirish, mustaqil fikrlaydigan shaxsni tarbiyalash, ijodkorlik qobiliyatini shakllantirish kabi vazifalarni amalga oshirib kelayotgan mazkur fakulьtet dekani, psixologiya fanlari nomzodi Muxtorov Erkin Mustafoevichlar ezgu tilaklarini tilab barchani tabrikladilar. Universitet jamoasi intellektual salohiyatni oshirish, etuk mutaxassislar tayyorlash borasida sezilarli natijalarga erishgan va erishib kelmoqda. Zero, istiqbolda qilinadigan ishlar hali ko‘p ekanini ham ta’kidlash kerak.Yakdillik, hamjihatlik, bag‘rikenglik va yuksak ilmiy salohiyat asosiy mezon bo‘layotgani universitet jamoasi har doim mamlakatimiz ravnaqiga, ona-Vatanimizning jahon hamjamiyatidagi mavqei bundan ham yuksalishiga o‘zining munosib hissasini qo‘shadi, deyish uchun to‘la asos beradi. Shu fursatdan foydalanib, bugun, tadbirda ishtirok etgan, Vazirlik va tashkilot rahbarlariga, Viloyat hokimligi va turli korxona, tashkilot vakillariga, Oliy majlis Senati, Qonunchilik palatasi deputatlariga, BuxDUning sobiq bitiruvchilari, jamoatchilik tashkilotlari vakillari, Buxoro davlat universiteti jamoasiga minnatdorchilik bildiramiz.Ishonamizki, bugunimiz ham oliygohimizning tarix sahifalaridan eng tantanali, shodiyona kun sifatida o‘rin oladi. Shu lahzalarda dilimizdagi ezgu tilaklarimiz tilimizga ko‘chadi: 90 yoshni qarshilagan oliygohimizga ming yillik yubileylarini nishonlash ham nasib etsin!BuxDU Matbuot xizmati
