Oʼqituvchi, murabbiy, ustoz. Barchamizning qalbimizga yaqin boʼlgan oddiygina bu soʼzlar zamirida katta maʼno va mazmun mujassam. Zero har qaysi inson oʼqituvchining qoʼlida savod chiqaradi, murabbiy va ustozdan taʼlim oladi, tarbiya topadi. Bugun biz biron kasbni egallab, Vatan va el koriga yarayotgan ekanmiz, avvalo, ulardan minnatdor boʼlmogʼimiz tabiiy, albatta.Darqaqiqat, inson eng avvalo, unga bilim va maʼrifat dunyosi sari yoʼl ochib bergan, qalbiga yuksak insoniy fazilatlar hissini singdirishda zahmat chekkan ustoz va murabbiylariga nisbatan koʼnglida hamisha minnatdorlik tuygʼusini asrab-avaylaydi. Maktab ostonasiga ilk qadam qoʼyganimizda qoʼlimizga qalam tutqazib, alifboni oʼrgatgan birinchi ustozimiz siymosini, uning fidokorona mehnatini doimo minnatdorlik bilan eslaymiz va qalbimizda ularga nisbatan hurmat-ehtirom hissi bizni bir umr tark etmaydi. Ha, olam gultoji inson boʼlsa, ular orasida suyuklisi ustoz – muallimdir. Shu bois ham xalqimizda “Ustoz otangdek ulugʼ”, degan hikmat bor. Ustozni otaday ulugʼ deb bilgan maʼrifatparvar xalqimiz muallim va murabbiy zotini hamisha ardoqlab, ularning mehnatini qadrlab keladi.Mana shunday fidoyi va jonkuyar ustozlardan biri Buxoro davlat universiteti Jismoniy madaniyat fakulьteti, Fakulьtetlararo jismoniy madaniyat va sport kafedrasi katta oʼqituvchisi, voleybol boʼyicha respublika toifasidagi hakam, xalq maorifi aʼlochisi Qoʼchqor Botirovich Chinqulov 2020 yil 13 avgust 82 yoshida vafot etdi.Qoʼchqor Botirovich Chinqulov 1938 yil 26 martda Navoiy (oldingi Buxoro) viloyatining Qiziltepa tumani Toshrabot qishlogʼida dehqon oilasida tavallud topdi. Bolaligidan sportga mehr qoʼygan Qoʼchqor Chinqulov 1956 -1958 yillari Samarqand shahridagi Jismoniy tarbiya texnikumini muvaffaqiyatli oʼqib tugatdi.Iqtidorli sportchi olgan bilimlarini yanada mustahkamlash va yetuk mutaxassis boʼlish maqsadida 1958-1962 yillarda Oʼzbekiston davlat jismoniy tarbiya institutida tahsil oldi va ushbu oliygohni aʼlo baholarda tugatdi.1962 - 1998 yillarda Buxoro davlat universitetining Jismoniy madaniyat fakulьtetida faoliyat yuritib oʼqituvchi, katta oʼqituvchi, oʼquv ishlari boʼyicha dekan muovini lavozimlarida ishladi.Q.B.Chinqulov voleybol sport turi boʼyicha yetuk malakali murabbiy boʼlib yetishdi. Doimiy ravishda viloyat, respublika, sobiq ittifoq miqyosida oʼtkazilgan musobaqalarda u murabbiylik qilgan jamoa faxrli oʼrinlarni egallab keldi. Shu bilan birgalikda yuqori tashkilotchilik qobiliyatiga ega boʼlgan ustoz musobaqalarni tashkil qilib oʼtkazishda va hakamlik qilishda oʼzining munosib hissasini qoʼshibdi.Q.B.Chinqulov murabbiylik faoliyati davomida koʼplab iqtidorli sportchilarni tarbiyalab voyaga yetkazdi. Bugungi kunda uning shogirdlari barcha sohalarda shu bilan birgalikda jismoniy madaniyat va sport sohasida ham oʼzlarining munosib hissasalarini qoʼshib kelmoqdalar. Shogirdlaridan O.Farmonov, M.Gʼafurova, F.Narzullaev, M.Mahmudov ustoz izidan borib bugungi kunda Buxoro davlat universiteti Jismoniy madaniyat fakulьtetida yoshlarga voleyboldan saboq bermoqdalar.Jismoniy tarbiya va sport jamiyatning murakkab, koʼp qirrali hamda oʼziga xos sohasidir. Bu sohani zamon talablari asosida tashkil etish koʼp hollarda kadrlarning salohiyatiga bogʼliq. Q.B.Chinqulov oʼzining pedagogik faoliyati davomida boʼlajak oʼqituvchilarga jismoniy tarbiya darslarining samaradorligini oshirishga, yosh avlodning barkamol shaxs boʼlib yetishishida samarali ilmiy, pedagogik faoliyat olib borish bilan birga yoshlarning intellektual salohiyatini oshirishga munosib hissa qoʼshib keldi. Q.B.Chinqulov 1988 yilda “Xalq maorifi aʼlochisi” koʼkrak nishoni mukofotlangan. Ustozning samarali mehnatlari universitet rahbariyati tomonidan faxriy yorliqlar va qimmatbaho sovgʼalar bilan munosib taqdirlangan.Sportchi - olim respublikamizda oʼtkaziladigan ilmiy-amaliy anjumanlarda oʼzining boy maʼlumotga ega boʼlgan maqola va tezislari bilan doimiy ravishda qatnashib keldi. Ilmga chanqoq yoshlarning maslahatgoʼyi edi.Qoʼchqor Botirovich Chinqulovning porloq xotirasi hamkasblari, shogirdlari qalbida umrbod muhrlanib qoladi. Ustoz boshlagan ezgu ishlarni davom ettirish, har tomonlama yetuk barkamol shaxslarni voyaga yetkazish borasida biz shogirdlar uning bergan saboqlariga doimo amal qilamiz.Oxiratlari obod, ruhlari shod boʼlsin.Jismoniy madaniyat fakulьteti jamoasi
