2020-yilning 6-iyul kuni Buxoro davlat universiteti rektori O.Xamidov, xalqaro hamkorlik bo‘yicha prorektor A.Jo‘rayev, Buxoro shahri hokimi o‘rinbosari K.Davronov, Shanxay hamkorlik tashkilotining Pekindagi bosh ofisining o‘zbekistonlik vakillari bilan Xitoyning Sanya universiteti rahbariyati o‘rtasida onlayn muloqot o‘tkazildi.Sanya universiteti 2005 yilda tashkil etilgan bo‘lib, jahonning eng yirik xoldinglardan biri bo‘lgan Djili xoldingi (Geely Holding Group) tarkibiga kiruvchi kompaniyalar tomonidan moliyalashtirib kelinadi. Universitet Xitoyning eng jadal o‘sayotgan va eng raqobatbardosh xususiy oliy taʼlim muassasasi hisoblanadi.Universitet tarkibiga 18 ta fakultet kirib, 9 fan sohasida (iqtisodiyot, menejment, huquq, adabiyot, taʼlim, sanʼat, muhandislik, aniq fanlar va tabiiy fanlar) 71 bakalavriat yo‘nalishida taʼlim beriladi. Eng zamonaviy texnologiyalar asosida yaratilgan kutubxonada 2 mln. ga yaqin kitob saqlanadi.Muloqotda o‘zaro hamkorlikning ustivor yo‘nalishlari muhokama qilindi. O‘zbekistonning Xitoy bilan tobora rivojlanib borayotgan iqtisodiy-ijtimoiy aloqalari doirasida oliy taʼlim muassasalari o‘rtasidagi hamkorlik alohida ahamiyat kasb etishi taʼkidlandi. Ilk qadam sifatida hamkorlik memorandumini imzolashga kelishib olindi. Keyingi bosqichlarda esa BuxDUda xitoy tilini o‘qitish markazi tashkil qilish, hudud ehtiyojidan kelib chiqqan holda ustivor yo‘nalishlarda qo‘shma taʼlim dasturlarini yo‘lga qo‘yish masalalari ko‘rib chiqiladi.
