Respublika yosh olimlar kengashi tashabbusi bilan “Maqsadlar yoʼlida yoshlarni birlashtiramiz!” degan ezgu shior ostida Buxoro davlat universitetida “Yosh olimlarning yangi nafasi” deb nomlangan uchrashuv boʼlib oʼtdi. Unda universitet jamoasi, talabalar, ilmiy tadqiqotchi yosh olimlar qatnashdilar. Uchrashuvni ochar ekan, universitetning yoshlar maslalari bo`yicha prorektor A.M. Kadirov “Yoshlarning zamonaviy texnika va texnologiyalar hamda innovatsiyalar bilan butunlay yangi iqtisodiyotni yaratayotganligi hozirgi davrning eng buyuk mo`jizasidir. Shuningdek, men bugun davrada o`tirgan har bir yosh talabadan kelajakda ilmiy-texnologik innovatsiya kutib qolaman" - deya talaba-yoshlarni yangicha g`oyalarga undadi.Shundan soʼng respublika yosh olimlar kengashi direktori S. Babadjanov soʼzga chiqib, kengash tomonidan amalga oshirilayotgan ishlar xususida batafsil toʼxtaldi. Qator loyihalarni ilgari surgan holda yoshlarni faollikka undadi. U filialda oʼzaro hamkorlikda “Yosh isteʼdodlar maktabi”ni tashkil etish taklifini bildirdi. Bundan maqsad respublikamizdagi iqtidorli yoshlarni intellektual, ijodiy salohiyatini yuksaltirish, talabalarni professor ustozlarga biriktirgan holda ilmiy tadqiqot va izlanishlariga qiziqishlarini oshirish, yosh isteʼdodlarning xalqaro va respublika tanlovlarida qatnashishlarini taʼminlash ekani alohida taʼkidlandi. Uchrashuvda talabalar o`zlarini qiziqtirgan savollarga javob oldilar. Eʼtiborli jihati, shu kuni Buxoro davlat universiteti bilan istiqbolda belgilangan vazifalar yuzasidan hamkorlik memorandumi imzolandi. Bu memorandum istiqbolli kadrlar sonining oshishiga xizmat qiladi.
