Oliy ta'lim dargohida faoliyat yurituvchi har bir o'qituvchi o'z kasbiy malakasini muntazam oshirib borishi - davr talabi. Universitetimizning ingliz tili o'qituvchilari ham Britaniya Kengashi (British Council) bilan hamkorlikda tashkil etilgan Kasbiy Rivojlanish Markazida (PDC - professional development center) o'z mahoratlarini oshirib kelmoqdalar. Ingliz tilshunosligi kafedrasi qoshida 2018 yildan buyon faoliyat ko'rsatayotgan mazkur markazda pedagog xodimlar kasbga oid zarur zamonaviy chet el adabiyotlari, audio-video materiallar hamda muntazam o'tkaziladigan treninglar orqali tajriba almashgan holda o'z bilim va malakalarini yanada boyitib bormoqdalar. Kuni kecha Toshkent shahridagi Respublika ilmiy-innovatsion markazida mamlakatimizdagi barcha Kasbiy Rivojlanish Markazlari (PDC) o'rtasida o'tkazilgan tanlov natijalari asosida g'oliblarni aniqlash va taqdirlash marosimi bo'lib o'tdi. Tanlovda Buxoro davlat universitetining KRM (PDC) birinchi o'ringa munosib deb topildi. Britaniya Kengashi mutaxassislari tomonidan zamonaviy baholash mezonlari asosida saralab olingan markazga Kengash tomonidan Samsung rusumli televizor sovg'a qilindi. Shu o'rinda universitetimiz rahbariyatiga PDC faoliyatini zamonaviy talablar asosida tashkil etishga yaqindan yordam bergani va qo'llab-quvvatlagani uchun minnatdorchilik bildiramiz.
