Assalomu alaykum muhtarama onaxonlar! Qadrli opa-singillar. Ko‘klam – uyg‘onish, yangilanish fasli. Uning tafti nafaqat tabiat, balki ko‘ngillarga ham g‘ayratu shijoat baxsh etadi. Ana shunday kunlarda sizlarni “8 mart – Xotin-qizlar kuni” bayrami bilan qizg‘in tabriklab, sizlarga o‘zimning samimiy tilaklarimni izhor etishdan baxtiyorman. Ayol haqida so‘zlaganda avvalo ko‘z oldimizga mo’tabar, nurli siymo munis onalarimiz, ko‘ngilga yaqin opa-singillarimiz keladi. Ularni alohida e’zozlashni eng sharafli burchimiz deb bilamiz. Negaki, ayolni e’zozlagan erkak baxtli bo‘lishi, ayolni hurmat qilgan millat kam bo‘lmasligini biz barchamiz yaxshi bilamiz.Bugun ozod va obod yurtimizning barcha sohadagi dadil qadamida, erishayotgan olamshumul yutuqlarida xotin-qizlarning munosib hissasi bor. Ularga ko‘rsatilayotgan beqiyos g‘amxo‘rlik hamda yuksak e’tibor tufayli mamlakatimiz ayollarining jamiyatdagi mavqei va nufuzi yuqori darajada.Buxoro davlat universitetida faoliyat yuritish bilan birgalikda mukarram onalik sharafi, latofatli va nazokatli ayollik baxtiga, to‘kis bekalik saodatiga erishgan onaxonlarimiz va opasingillarimiz uchun bayram tuhfasi sifatida tashkil etilgan tadbirda berilgan imkoniyatdan foydalanib, barchangizga sihat-salomatlik, baxt va omad, xonadonlaringizga fayzu baraka tilayman. Farzandlaringiz va yaqinlaringiz, elu yurtimiz baxtiga omon bo‘ling. Hamisha nurli yuzingizdan tabassum, pok qalbingizdan mehr arimasin.Аziz ayollar Siz borki, oilamizda qut – baraka, fayz bor, siz borki, naslimiz davom etmoqda, Sizni qancha sharaflasak, qadringizni qancha yuksakka koʼtarsak, biz avvalo oʼzimizni ulugʼlagan boʼlamiz, hayotni, yashashni, insoniyligimizni ulugʼlagan boʼlamiz. Аziz ayollar, doimo baxtimizga sogʼ-omon boʼling, chehrangizdan tabassum arimasin, bahor bayrami, yasharish bayrami muborak boʼlsin, taʼrifi tavsifga sigʼmas muhtaram ayollar! Buxoro davlat universiteti rektori, iqtisod fanlari doktori, professor O.X.Xamidov
