Bugun Аbu Аli ibn Sino nomidagi viloyat axborot-kutubxona markazida taniqli olim, filologiya fanlari doktori, professor, Oʼzbekiston Yozuvchilar uyushmasi aʼzosi Oxunjon Safarov tavalludining 80 yilligiga bagʼishlangan xotira kechasi boʼlib oʼtdi. Kechada ustozning farzand va shogirdlari, Buxoro davlat universiteti talabalari va turli yoshdagi kitobxonlar ishtirok etishdi. Muloqot davomida olimning oʼzbek folьklorshunosligi, adabiyotshunosligi va pedagogikasi rivojiga qoʼshgan hissasi, insoniy fazilatlari, shuningdek, salmoqli adabiy merosi xususidagi fikr-mulohazalar bayon etildi. Olimning ilm-maʼrifat yoʼlida chekkan zahmatlari yosh avlodga ibrat qilib koʼrsatildi. Serqirra ijodkorning “Shukr, elga qolar kitoblarim bor, Oʼn ming satrchalik sheʼr ham bitibman. Yashamoq sururi yurakda bisyor, Erkni qancha tuysam – shuncha tetikman” satrlariga hamohang yoʼsinda oʼquvchi va talaba-yoshlar tomonidan uning qator sheʼrlari yod aytildi. Kuyga solib ijro qilindi. Tadbir davomida joriy yilda olim tavalludining 80 yilligiga bagʼishlangan respublika ilmiy-amaliy anjumanini oʼtkazish, uning koʼp jildli asarlar toʼplamini nashr ettirish, olim nomi bilan yuritiladigan universitet folьklor muzeyini tashkil etish rejalari ham belgilab olindi.Oʼzbekiston Yozuvchilar uyushmasi viloyat boʼlimi axborot xizmati
