2019 yil 26 dekabr sanasida O'zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligining 2019 yil 23 dekabrdagi 18-5333-sonli xatiga binoan Buxoro davlat universiteti Kichik majlislar zalida "Islom ilm-fani va madaniyati rivojiga ulkan hissa qo'shgan buxorolik buyuk ajdodlarimiz, zamonamizning yetuk olim va ulamolari qalamiga mansub diniy-ma'rifiy asarlarini chop etish va aholiga yetkazishga ko'maklashish borasida bajarilayotgan ishlar" mavzusida olimlar, soha mutaxasisilari, jurnalist va blogerlar ishtirokida matbuot anjumani bo'lib o'tdi.Anjumanda raislikni Baxtiyor Asadov olib bordi. Shuningdek, Mir Arab Oliy madrasasi rektori Yo'ldoshxo'jayev Haydarxon, BuxDU Tarix va madaniy meros fakulteti dekan muovini Abduraim Boltayev, BuxDU Islom tarixi va manbashunosligi kafedrasi mudiri Bobur Namozov va Bohouddin Naqshband majmuasi imom-xatibi Abdug'ofur domlalar xalqaro tashkilot ISESCO tomonidan 2020 yilda Buxoro shahrining Osiyo mintaqasida Islom madaniyati poytaxti bo'lishi, shu munosabat qilinayotgan ishlar, soha mutaxasislarning buxorolik tasavvuf namoyondalari asarlarining tarjima yoki qayta nashr etilayotganligi xususida to'xtalib o'tdilar. Takidlash joizki, Buxoro shahrining islom madaniyati poytaxti deb e'lon qilinganligi sababli 2020 yilda Buxoro viloyat hokimligining kelgusi yildagi xalqaro konferensiya, ilmiy tadbir va ziyorat turizmni na'munali o'tkazish maqsadida chora-tadbirlar rejasi belgilab olingan edi. Bu kabi anjumanlar bevosita chora-tadbirlar rejasining ijrosini ta'minlab qolmay, bu borada jamoatchilik fikrini bilishga yordam beradi. Anjumanda G. Navro'zova, A. Boltayev, B. Namozovlar tomonidan tarjima qilingan Muhammad Porsoning "Risolayi Qudsiya", "Risolayi Kashfiya", Mavlono Yaqub Charxiyning "Risolayi Unsiya", Maxdumi A'zamning "Al-aladu Siroti Abiyxi", Ibn Arabiyning "Risolayi vujudiya", Xujviriyning "Kashful Maxjub" kabi asarlari haqida tushuncha va mulohazalar bildirildi. Anjuman so'ngida jurnalist va blogerlar arab muarrixlarining asarlariga nega e'tibor berilmayotganligi, Islomiy qarashlar hozirda yoshlar tomonidan noto'g'ri qabul qilinayotganligi haqida savollar berib o'tdilar. Soha mutaxasislari tomonidan savollarga berilgan javoblardan so'ng, yosh bloger, "Buxoro islom madaniyati poytaxti" telegram kanali asoschisi Javohir Saidov o'zining bir qator takliflarini berib o`tdi. Xususan, ijtimoiy tarmoqlarda ko'p vaqtini o'tkazayotgan yoshlarga islomiy ma'rifatni yetkazish, Imom Al-Buxoriy, B. Naqshband kabi mashhur din va tasavvuf allomalarining asarlarini ingliz tiliga tarjima qilish, xalqaro jurnallarda buni chiqarish, kelgusida chiqadigan kitoblarni videorolik ko'rinishida ommaga targ'ib qilish va shu orqali asarlarning hammabopligini ta'minlash kabi masalalarni ko'tarib chiqib, OAV va mualliflarni hamkorlikka chaqirdi. Muxtasar qilib aytganda, bu kabi ochiq holda tashkil etilgan anjumanlar yo'lga qo'yilgan kamchilik va erishilgan yutuqlarni qiyosiy tahlil qilishda o'z hissasini qo'shishiga ishonamiz.Anjumandan fotolavhalar: Buxoro davlat universiteti Matbuot xizmati xodimi: Javohir Saidov
